امريکا عراق ته ۳۵۰ اضافي عسکر لېږي
۱۳۹۳ شهریور ۱۲, چهارشنبه![](https://static.dw.com/image/17896170_800.webp)
د امريکا متحدو ايالاتو جمهور رئيس بارک اوباما لارښوونه کړې ده چي عراق ته دي ۳۵۰ اضافي عسکر ولېږل سي.
د سپيني ماڼۍ د معلوماتو له مخي دغه عسکر به په بغداد کي د ديپلوماتيکو ماموريتونو او ديپلوماتانو ساتنه کوي.
د امريکا د دفاع وزارت وياند جان کربي په خبره نزدې ۵۰ عسکر چي په بغداد کي مېشت ول، هغوی به نورو سيمو ته ولېږل سي.
د نورو اضافي عسکرو په لېږلو سره امریکا د عراق په شمال کي د اسلامي دولت ډلي پرمختگ ته غبرگون ښيي.
عراق ته د اضافي ځواک د لېږلو تر پريکړي لږ دمخه، افراطي اسلامي دولت ډلي داسي يوه ويديو خپره کړه چي پکښې په سوريه کي د تښتول سوي امريکايي ژورناليست «ستيفن سوتلوف» وژنه ښوول کيږي.
د امريکا حکومت ويلي دي چي د ويډيو د څرنگوالي په اړه به پلټني وکړي. خو د سوتلوف، کورنۍ په غير مستقيم ډول د ويډيو رښتينوالی تائيد کړی دئ.
له څو اونيو راهيسي امريکايي جنگي الوتکي د عراق په شمال کي د اسلامي دولت ډلي پر مرچلو باندي يرغلونه پيل کړي دي.
عراق ته د امريکايي عسکرو د لېږلو غوښتنه د امریکا متحدو ايالاتو د بهرنيو چارو وزارت له خوا سوې او دفاع وزارت ئې د برابرولو چاري ترسره کړي دي.
د امريکا د دفاع وزارت په خبره، په عراق کي به شاوخوا ۸۵۰ تنه امريکايي عسکر ځای پر ځای سي.
«پياوړې سيمه ييزه همکاري»
پر دې سربيره به د امریکا متحده ايالاتو د پوځ يو لوړ پوړی استازی نژدې ختيځ ته سفر وکي، چي هلته د افراطي اسلامي ډلي پرضد «پياوړې سيمه ييزه همکاري» رامنځ ته کړي.
ويل سوي دي چي په بحراني سيمه کي به د بهرنيو چارو وزير جان کيري، د دفاع وزير چاک هېگل او د ملي امنيت سلاکاره ليزا موناکو، د منځگړتوب دنده پرغاړه ولري.
د امریکا متحدو ايالاتو هوايي ځواک د اگيست مياشتي له لومړيو راهيسي د عراق په شمال کي د اسلامي دولت ډلي پرضد د کردانو د «پيشمرگي ملېشې» او حکومتي ځواکونو ملاتړ کوي.
د دغو هوايي يرغلونو يو ستر هدف موصل ښار ته نژدې د اوبو په يوه بند کي د اسلامي دولت ډلي مېشت ځای دئ.