امريکا په عراق کې پر ایراني پلوه وسله والو بريدونه کړي
۱۴۰۲ دی ۵, سهشنبه
دامريکا متحده ایالاتو پوځي چارواکو ويلي دي چې د دوشنبې په ورځ یې په عراق کې پر ايراني پلوه وسله والو بريدونه کړي دي.
دا بريدونه تر هغه وروسته شوي دي چې وسله والو د کردستان په شمال اربيل پوځي اډه کې درې امريکايي عسکر ټپيان کړل.
د کتائب حزب الله مليشې چې د ایران له ملاتړه برخمنه ده، پر امريکايي اډه د بريد مسئوليت منلې وو.
ايران پلوه ډلې په غزه کې د حماس وسله والې ډلې پر ضد د اسرائيل د روانو تهاجمي عملياتو مخالفت کوي. دا په داسې حال کې ده چې امريکا د اسرائيل تر ټولو مهم متحد دی.
د اسرائيل او حماس ترمنځ د جګړې له پېل راهېسې په عراق او سوريه کې د امريکا پر پوځ لږ تر لږه ۱۰۰ بريدونه شوي دي.
په اربيل کې د امريکا متحده ایالاتو دا پوځي اډه تر دې دمخه هم څو ځله هدف ګرځېدلې ده چې د اکتوبر د ۲۶ نیټې د ډرون بريد هم شامل دی چې له دافع هوا سيستم هم تېر شوی وو خو چاودلی نه وو. په دسمبر میاشت کې د امريکا د سفارت پر ودانۍ د هاوان بريد شوی وو.
امريکايي چارواکو د بريد په اړه څه ويلي؟
د امريکا د ملي امنيت شورا وياندې ادرينه واتسن وويل چې له ټپي شويو عسکرو څخه یې د يوه ټپونه ډېر ژور دي.
واتسن وويل: «[ولسمشر جو بایډن] د هغو امريکايي عسکرو د ساتنې څخه چې له خطر سره مامخ دي، هیڅ لوړ لومړيتوب نه لري.» هغې زياته کړه: «که چېرې دا بريدونه دوام پيدا کړي، نو امريکا متحده ايالات به يې د ډول او وخت په اړه داسي عمل وکړي چي موږ يې ټاکو.»
امريکايي چارواکو ويلي دي چې بريدونو یې احتمالاً «د کتائب الله حزب الله ډلې څو وسله وال» وژلي او ډېر تاسيسات ويجاړ کړي دي.
د امريکا د دفاع وزير لوېد استينويلي دي: «د امريکا پوځي ځواکونو د کتائب الله حزب الله ډلې او په عراق کې یې د پلوي ډلو له خوا پر کاريدونکو دريو تاسيساتو اړين او متناسب بريدونه کړي دي.»
د امريکا د مرکزي قوماندې مشر ماېکل اريک کوريلا وويل: «د دې بریدونو موخه د هغو عناصرو څخه حساب اخيستل وو چې په عراق او سوريه کې پر ائتلافي ځواکونو د بريدونو مستقيم مسئوليت لري او دا چې بريدونو ته د دوام ورکولو توان یې راکم کړای شي.»
هغه وويل: «موږ به تل د خپلو عسکرو ساتنه وکړو.»
د سیمه ایزو رسنيو د رپوټونو په حواله د دوشنبې په سهار وختي، د سوریې پلازمينې دمشق ته څېرمه د اسرائيل يوه هوایي بريد يو لوړپوړی ایرانی جنرال وژلی دی. تر دې وروسته په سيمه کې ایراني پلوه وسله والو ډلو ويلي ول چې د هغه د مړينې غچ به واخلي.
ب. ص/ ن. ز (AP, Reuters, afp)
زموږ له آرشيف څخه: