په امریکا متحده ایالاتو کې رسنیو د قاسم سلیماني تر مرګ وروسته د امریکا د مرستیال ولسمشر مایک پنس ټویټري پیغامونه ناسم بللي دي. د تیرې جمعې په ورځ مایک پنس د ټویټر پر خپله پاڼه لیکلي وو چې قاسم سلیماني افغانستان ته د ۱۲ هغو ترهګرو له ډلې څخه د ۱۰ ترهګرو په تګ کې مرسته کړې وه چې بیا وروسته یې په امریکا متحده ایالاتو کې د سپتمبر میاشتې د ۱۱ نیټې ترهګریز بریدونه وکړل.

وروسته له هغې چې پر ټویټر باندې د پنس هغو څرګندونو ته غبرګونونه راوپاریدل چې د سپتمبر د ۱۱مې نیټې بریدونه ۱۲ ترهګرو نه بلکې ۱۹ ترهګرو ترسره کړې، د مایک پنس ویاندې کایټیا والدمن وویل چې پنس په مشخصه توګه هغو ترهګرو ته اشاره کړې چې افغانستان ته داخل شوي وو. نوموړې اضافه کړه چې له دې ۱۲ تنو څخه له ۱۱ تنو سره سلیماني مرسته کړې وه.

د نیویارک ټایمز په نامه یوې امریکايي ورځپاڼې بیا ویلي چې د سپتمبر د ۱۱ د ترهګریزو بریدونو د کمیسیون په ۵۸۵ پاڼیزه رپوټ کې د قاسم سلیماني نوم چې تر مرګ وړاندې د ایران د انقلابي ځواکونو د بهرنیو ماموریتونو یا القدس ځواکونو مشري یې پر غاړه درلوده، نه دی ذکر شوی.

نیویارک ټایمز لیکلي چې د کمیسیون په دغه رپوټ کې راغلي چې د سپتمبر د ۱۱ ترهګریزو بریدونو څخه وړاندې افغانستان د ترهګرو په انتقال کې د ایران د همکارۍ د احتمال یادونه شوې خو زیاتوي چې کمیسیون په خپل رپوټ کې ویلي چې داسې کوم شواهد یې نه دي موندلي چې ګواکې ایران او یا حزب الله د القاعده شبکې د دغو عملیاتو په هکله معلومات درلودل.

د امریکا مرستیال ولسمشر مایک پنس د ټویټونو په دغه لړۍ کې همدا راز ویلي چې قاسم سلیماني په افغانستان کې طالبانو ته د ایران د انقلابي ځواکونو مالي، لوژیستیکي او پوځي ملاتړ څاره او پر ائتلافي ځواکونو باندې یې د بریدونو په برخه کې مرسته کوله. مایک پنس په دغو ټویټونو کې همدا راز ویلي چې سلیماني په یمن، ترکیه او کینیا کې هم ورته ترهګریز بریدونه ترسره کړي دي.