د شمالي کوریا رهبر څنګه دی؟ داسې ګونګوسي دي چې کیم جونګ اُن د څو ورځو راهیسې په عام محضر کې نه دی راڅرګند شوی. امریکایې پوځ داسې شواهد په لاس کې نه لري چې ګوندې کیم دې وضعیت تر خپل کنترول لاندې ونه لري.
انځور: picture-alliance/Yonhap
اعلان
د امریکا د لوی درستیز مرستیال جان هایټن په خبره امریکایي پوځ په دې باور دی چې د شمالي کوریا رهبر کیم جون اُن د هغه د خراب روغتیايي وضعیت په اړه رپوتونو د خپریدو سربیره هم خپل هیواد رهبري کوي: «زه ګمان کوم چې کیم جونګ تر اوسه پورې د کوریا پر اتومي وسلو او ځواکونو بشپړ کنترول لري.»
هغه زیاته کړه چې د نورو سناریوګانو په اړه د فکر کولو په خاطر هیڅ دلیل شتون نه لري. هایټن خبریالانو ته وویل چې داسې استختباراتي معلومات په اختیار کې نه لري چې د کیم جونګ اُن جدي روغتیايي حالت تائيد یا هم رد کړي.
دغو اوازو او ګونګوسو وروسته له هغې زور واخیست کله چې دغه ۳۶ کلن ځوان تر یوې اونۍ د ډیر وخت له پاره په هغو تبلیغاتي پروګرامونو کې را ښکاره نه شو چې د دغه منزوي شوي کمونیستي هیواد د دولتي رسنیو له لارې په بهرنیو هیوادونو کې هم خپریږي.
کیم د خپل هیواد له مهمو رخصتیو څخه تیریږي
هغه حتی د اپریل میاشتې په ۱۵ نیټه د خپل نیکه کیم ایل سونګ، د زوکړې په مناسبت جوړیدونکو مراسمو کې چې هر کال د شمالي کوریا په رسنیو کې ورته پراخ پوښښ ورکول کیږي هم را څرګند نه شو. د دغه هیواد د بنسټ ايښودونکي د زیږیدو ورځ لمانځنه د دغه هیواد په دولتي جنترۍ کې مهمه ورځ بلل کیږي. د کرونا ویروس د وبا له امله دغه مراسم هم په ډیر کوچني چوکاټ کې ترسره شول.