۲۰۷ ظفر قل اردو کې د بې پیلوټه کشفي الوتکو ساحه پرانیستل شوه. د هرات والي عبدالقیوم رحمي، وایي چې اوسمهال دوی کولای شي د افغانستان په لویدیځو ولایتونو کې د یاغیانو پټنځايونه په کشفي بې پيلوټه الوتکې سره تر نظر لاندې وساتي.

دغه کوچنۍ بې پیلوټه الوتکې یوازې د کشفي عملیاتو له پاره دي. دغه الوتکه کولای شي د خپل کنترول له مرکز څخه تر ۱۲۰ کیلومترو پوري والوزي.

د ۲۰۷ ظفر قل اردو قوماندان جنرال نور الله قادري، وايي چې بې پيلوټه الوتکې د افغان امنیتي ځواکوو د عملیاتو د مخ ته وړلو په برخه کې اغیزمني دي.

د جنرال نورالله قادري په خبره، د بې پیلوټه الوتکي په واسطه د طالبانو قرارګاوې پيژندل کیدای شي چې دا به په لویدیځ کې د ملي ادرو ځواکونو له پاره یوه لویه لاس ته راوړنه وي.

د ظفر قل اردو د مسئولینو په وینا، افغان امنیتي ځواکونه به د بې پيلوټه کشفي الوتکو په برخه کې د روزنې پر مټ د امنیت په ټینګښت او دښمن په ځپلو کې ډیري لاس ته راوړني ولري.

مسئولین وایي چې په پام کې ده له دغو تجهیزاتو څخه په تصفیوي او محاربوي عملیاتو کې کار واخیستل شي.

د افغانستان په لویدیځ کې د ۲۰۷ ظفر قل اردو قوماندان جنرال نورالله قادري وایي، چې په پام کې ده د ناټو پریکړنده ماموریت، ځواکونه د ملي اردو ځواکونو ته دوې بې پيلوټه جنګي الوتکې په اختیار کې ورکړي.

په افغانستان کې د ناټو «پریکړنده ماموریت» د افغانستان له دولت او خلکو سره د دوامداره ژمنو ډاډ ورکړی دی او ویلې يې دي چې د دفاعي ځواکونو تعلیم، تجهیز او مسلکي تعلیم د دوی په کاري لومړیتوبونو کې دي.

د پوځي چارو پوهان له پرمخ تللو تجهیزاتو څخه کار اخیستل د امنیتي او دفاعي ځواکونو د مورال د سطحې لوړیدو په برخه کې اغیزمن ګڼي.

د افغانستان د هوایي ځواک افسران چې په وروستیو کې یې په هرات ولایت کې د بې پیلوټه الوتکو په برخه کې روزنیز کورس سرته رسولی وایي چې د پریکړنده ماموریت له لوري په روزنیزه دوره کې له نویو پوځي تکتیکونو سره آشنا شوي دي.

وخت ناوخته په جنګي او تصفیوي عملیاتو کې سهواً ملکي کسان هدف ګرځي. کارپوهان هیله من دی چې له بې پیلوټه الوتکي څخه استفاده ښایي د ملکيانو د تلفاتو د کمښت سبب شي.