رویترز خبري آژانس په خپل رپوټ کې لیکلي دي چې افراطي ډله «اسلامي دولت» یا داعش په افغانستان کې نسبتا نوی ځواک دی او په وینا یې دغې یاغي ډلې د افغانستان په ځینو برخو کې وسله وال طالبان له چلینج سره مخامخ کړي دي.

د امریکا متحدو ایالاتو ولسمشر بارک اوباما په جنورۍ میاشت کې پوځ ته د داعش پر ضد د بمباریو اجازه ورکړه. تر دې د مخه هم امریکایي ځواکونو په افغانستان کې د داعش پر ضد بمباري کولای شوای، خو په هغه صورت کې چې د خپلو ځواکونو خوندیتوب يې اړين وای.

د امریکا د پوځ یوه ویاند ډگر جنرال ویلسن شوفنر، خبریالانو ته وویل: «په تیرو اوونیو کې په ننگرهار ولایت کې موږ په ځانگړې توگه د داعش پر ضد فشار او د هوایي بریدونو شمیر زیات کړی دی. دې بدلون، موږ ته اضافي انعطاف پذیري راکړه.»

شوفنر د هوایي بریدونو د دقیق شمیر له ورکولو څخه ډډه وکړه خو ویې ویل چې له افغان امنيتي ځواک سره په گډه په ننگرهار کې پر داعش باندي لاس بري شوي دي.

د افغانستان د کورنیو چارو وزارت د معلوماتو له مخې په ننگرهار ولایت کې په جنوري میاشت کې افغان او نړیوالو ځواکونو د داعش پر ضد کابو شل عملیات کړي دي.

شوفنر په خپلو خبرو کې ویلي دي چې اسلامي دولت، یا داعش اوس د دې جوگه نه دی چې په یوه وخت تر یوه تعرض پرته ډیري حملې وکړي، خو په وینا یې په ننگرهار کې د یوه مرکز د جوړولو او د هیواد په ځینو برخو کې خپلو لیکو ته د جنگياليو د جذبولو هڅه کوي.

د هغه په خبره د افغانستان په ختیځ کې د دغي ډلي جنگیالیو شمیر له ۱۰۰۰ څخه تر ۳۰۰۰ تنو دی.

د شوفنر، په خبره هغه کسان چې له داعش سره یو ځای کیږي د افغان طالبانو او یا پاکستاني طالبانو چې «تحریک طالبان پاکستان» نومیږي، له ډلي جلا شوي غړي دي.

د ناټو یوه هوایي برید تیره میاشت په ننگرهار ولایت کې د داعش راډیو ویجاړه کړه. دغه راډیو د ورځې ۹۰ دقیقي په پښتو او دري ژبو خپرونې درلودې.