د هنګري لومړي وزير ويکتور اوربان ويلي چي مهاجرت اروپا ته زښت زيان اړوي. نوموړي ويلي چي هيواد يې «يو مهاجر» ته هم اړتيا نه لري.
انځور: picture-alliance/NurPhoto/K. Dobuszynski
اعلان
د هنګري هيواد ښې اړخي سياستوال او لومړي وزير ويکتور اوربان يو ځل بيا د مهاجرت او مهاجرو پر ضد وينا کړې ده. نوموړي د سه شنبې په ورځ (د ۲۰۱۶ کال د جولای په ۲۶مه) وويل چي و اروپا ته د مهاجرو راتګ «يو زهر» دی.
ويکتور اوربان ويلي چي هيواد هنګري يې يو واحد مهاجر ته لا هم اړتيا نه لري. هغه زياته کړې: «هنګري د اقتصاد او کار له پاره يو واحد مهاجر ته لا هم اړتيا نه لري، نه هم د دې له پاره چي نفوس يې کم نه سي، نه هم د هيواد د راتلونکي له پاره.»
د هنګري لومړي وزير زياته کړه: «د مهاجرت له پاره د اروپا د مشترکي هيڅ پاليسۍ اړتيا نسته. هر څوک چي مهاجر غواړي کولای سي چي مهاجر واخلي خو پر موږ دي يې نه تحميلوي ولي چي موږ ورته اړتيا نه لرو.»
د هنګري دغه پارونکي سیاستوال زياته کړه: «هر واحد ماجر د عامه امنيت او ترهګرۍ ګواښ دی.» هغه وويل: «زموږ له پاره مهاجرت حل نه بلکه يوه ستونزه ده... دوا نه بلکه زهر دي، موږ دې ته اړتيا نه لرو او دغه (زهر) به تېر نه کړې.»
