په اولاد زيږولو کې يوازې د مور عمر هغه څه نه دی چې بايد ډېر جدي وگڼل شي. اوس ېوې نوې څېړنې موندلې ده چې د پلار سن ښايي د ماشوم او يا د مور له پاره د ميندوارۍ پر وخت د روغتيايي ستونزو سبب وگرځي.
انځور: picture-alliance/dpa/P. Kneffel
اعلان
ډېري هغه جوړې چې غواړي اولاد وزيږوي په دې پوهيږي چې د څو لسیزو څيړنې دې ته اشاره کوي چې که د ميندوارې پر وخت د ښځې عمر تر ۳۵ زيات وي نو ښايي د مينداورۍ پر وخت هغه روغتيايي ستونزې رامنځته شي چې په عمر پورې تړلي وي.
دا چې ساينس په دې برخه کې زياتره پاملرنه مور ته کوي، د توجې وړ او يو فطري عمل دی، ځکه چې څرگنده ده چې ښځه په ميندوارۍ کې تر ټولو مهم نقش لري.
تر ۳۵ کلنۍ وروسته که نارينه غواړي چي اولاد پيدا کړي لومړی دي له ډاکټر سره مشوره وکړي.انځور: picture-alliance/dpa/F. May
د کارپوهانو په حواله دا نوي زيږيدلي ماشومان په بېلا بيلو روغتيايي ستونزو د اخته کيدو له خطر سره مخامخ وي او همدا راز د مور په خېټه او يا د زيږون پر وخت یې د مړينې خطر هم موجود وي.
د څيړنې په نتايجو کې د هغو کسانو چې د زيږون پر وخت یې د پلرونو سنونه تر۵۰ کلونو زيات وي، د «شيزو فرينيا» او «آستيزم» چې يو ډول رواني ناروغۍ دي، ترمنځ اړيکي ته اشاره شوې ده. دا هغه څه دي چې په يوه بيولوژيکي رواني ژورنال کې هم ورته اشاره شوې ده.
د دې څېړنو يوه ليکواله گلوريه باخمن چې د نيوجرسي د روتگرز پوهنتون د ښځو د روغتيا د انستيتويت مشره ده، وايي: «که څه هم چې دا يوه مستنده خبره ده چې د زيات عمر لرونکو پلرونو ماشومان زيات په «شیزوفرينيا» اخته کيږي، خو علت یې تر اوسه په سمه توگه روښانه شوې نه دی.»
دا څه معنا لري؟
باخمن وايي د دې څېړنې نتايج د نارينه وو له سپرم «مني» سره تړاو لري. لکه څرنگه چې انسانان د وخت په تیريدو سره د عضلاتو قوت او ځواک له لاسه ورکوي، سپرم هم هغسې خپله قوت او تندرستي له لاسه ورکوي. دا کار د حمل پر اخيستو هم اغیز کوي او د حمل په صورت کې هم د ستونزو سبب کيږي.
خو دا تر اوسه روښانه نه ده چې د نارينه وو کوم مشخص سن پر ميندوارۍ منفي اغیزې کوي. د رپوټ په حواله دا ښايي د ۳۵ او ۴۵ ترمنځ وي. خو دا اربتاط شته او څيړونکي یې په اړه د ژورو څېړنو غوښتنه کوي.
B.S/N.Z (Clare Roth)
د امیدواره ښځو له پاره ګټور ورزشونه
د حامله ښځو له پاره د امیدوارۍ پر مهال ورزش یا حرکت ډیر ګټور دی. که څه هم امیدواره ښځي باید د رزمي ورزشونو او سیکي په شان خطر لرونکو ورزشونو څخه ډډه وکړي، خو کوم ورزشونه دوی ته ګټور او حتی ضروري دي؟
انځور: Fotolia/oksun70
د امیدوارۍ پر مهال ښځو ته ورزش کول ډيره ګټه رسوي. خو دغه ښځې باید له رزمي او هغو ورزشونو څخه ډډه وکړي چې په هغو کې د لویدو خطر موجود وي، لکه سيکي، سکیټ، آس ځغلونه او داسي نور.
د امیدوارۍ پر مهال هر ډول ورزش باید نه یوازي د ښځې له جسمي وضعیت، بلکي د امیدوارۍ له مرحلې سره هم مطابقت ولري. په لومړیو درو میاشتو کې ښځي زړه بدوالی لري او له ورزش سره لږ میلان ښکاره کوي، خو له ۴ څخه تر ۶ میاشتو پوري بیا په اسانۍ سره ورزشي حرکتونه کولی شي.
د امیدوارۍ پر مهال د ښځو بدن ته لږ اکسیجن رسیږي. په دې مرحله کې باید تر اندازې ډیر ورزش ونه شي کوم چې د ډیري ستړتیا سبب شي. په دې وخت کې باید نبض کنترول کړئ. که د نبض ضربان په یوه دقیقه کې تر۱۴۰ ډیر شو باید ورزش بند او استراحت وکړئ.
انځور: picture-alliance/dpa/M. Gambarini
ځيني ساده حرکتونه او د سپکو وزنونو منظم ورزش د بدن او ملا د پیاوړې کیدو سبب ګرځي. د دا ډول حرکتونو له پاره منظم تنفسي تکتیکونه ډیر مهم دي.
انځور: Colourbox/Artur Bogacki
د امیدوارۍ پر مهال د ښځو له پاره بایسیکل چلول ډیر ګټور ورزش دی. خو په وروستیو میاشتو کې د ګیډې د غټوالي له امله د خپل توازن ساتل مشکل وي، نو له دې امله بهتره ده چې په کور کې د ساکن بایسیکل ډوله ماشينونو څخه کار واخیستل شي.
انځور: picture-alliance/dpa/B. Marks
که څه هم منډې وهل د یو شمیر امیدواره ښځو له پاره ډیر مشکل وي، خو پیاده ګرځیدل ورته ډیره ګټه رسوي.
انځور: picture-alliance/dpa
ډاکتران سپارښتنه کوي چې د ۳ یا ۴ میاشتني امیدوارۍ پر مهال جمناستيکي حرکتونه ډیر ګټور دي، خو مخکې تر دې باید په نرمشي حرکتونو بدن ښه ګرم شي. دا حرکتونه بیا وروسته د ماشوم د زیږیدو پر مهال ډیره مرسته کوي.
انځور: picture-alliance/dpa
امیدواره ښځي باید متوجه اوسي چې د ورزش پر مهال د سرګرځېدني، نفس تنګۍ، خونریزۍ، په لاره تګ کې د ستونزې او درد د احساس پر مهال په بیړه ورزش بند او د مشکل د دوام په صورت کې داکتر ته مراجعه وکړي.
