د فرانسې خبري آژانس د تازه ارقامو له مخې په اودیسه کې د روسيې په توغندویز بریدونو کې د مړو شمير ۱۶ ته پورته شوی او ۵۵ نور ټپیان دي. رپوټ وايي د روسي ځواکونو په دغو حملو کې کورونه، موټر او د ګازو شبکې په نخښه شوي دي.
د اودیسه والي اوليه کيپر وويل چې د جمعې په ورځ (۲۰۲۴ کال د مارچ ۱۵) د روسيې په توغنديز برید کې ۱۴ کسان وژل شوي دي چې په هغو کې مرستندویان هم شامل دي. هغه پر ټيلګرام ليکلي: «له بده مرغه د روسيې د توغندیز برید په نتيجه کې یو مرستندوی او یو ملکي ژغورونکی وژل شوي دي.»
د نورو وژل شوو کسانو په هکله جزئيات نه دي ورکړل شوي.
د آلمان خبري آژانس له کيف څخه ليکي چې یاد ژغورونکی تر لومړۍ چاودنې وروسته د پېښې ځای ته ځان ورساوه چې د دوهم توغندي په لګېدو کې ووژل شو. د ملکي مرستندوي په هکله ويل شوي چې د ګڼو ټپونو له کبله ېې خپل ژوند له لاسه ورکړ. زیاته شوې چې په دغو بریدونو کې ټول ټال ۴۶ کسان ټپيان شوي دي.
والي کيپر سبا شنبه د مارچ ۱۶مه په اودیسه کې د یو ورځنی ماتم غوښتنه کړې ده. ملکيانو څخه د ژغورنې ادارې چارواکو ويلي دي چې په دغو حملو کې۱۰ رهایشي ساختمانونه او دوه د اطفائي ماشينونه هم تخریب شوي دي.
د آرشیف انځور - په اودیسه ښار کې د روسي ځواکونو تر برید وروسته بيړنۍ مرستندويان د ماموریت پر مهالانځور: Ukrainian Emergency Service Office/AP Photo/picture alliance د اوکراین اودیسه ښار او د هغه بندرونه د روسي ځواکونو له پاره د مهمو اهدافو څخه دي چې پرې د توغنديو او ډرونونو حملې کوي. دغه حملې له څه باندې دوه کلونو راهيسي چې روسيې پر اوکراین پوځي یرغل کړی، ادامه لري.
رپوټ زیاتوي چې روسي ځواکونو د جمعې په شپه د اوکراین پر غربي سيمې، وینیستا، هم د ډرون بریدونه وکړل چې ۲ کسان پکې وژل شوي او درې نور ټپیان شوي دي چې بيا روغتون ته رسول شوي دي. یو چارواکي ويلي دي چې په دغه بریدونو کې د هستوګنې يو ساختمان په نخښه شوی دی.
یاد آژانس په خپل يو بل خبر کې وايي چې اوکرايني چارواکو د جمعې په ورځ له روسيې څخه د ۱۰۰ عسکرو مړي چې په جګړه کې وژل شوي ول، تر لاسه کړي دي.
د جنګي زندانیانو له پاره د اوکراین د همغږۍ دفتر ويلي دي چې دغه جسدونه به تر پېژندګلوۍ وروسته د هغوی کورنیو او خپلوانو ته وسپارل شي. د سره صلیب نړېوالې ادارې چې په دې برخه کې ېې منځګړيتوب کړی، ويلي دي چې روښانه نه ده چې آيا روسیې هم په جګړه کې د خپلو عسکرو مړي ترلاسه کړي دي او که نه.
(dpa)mks/nz
له آرشیف څخه:
اوکراین: د جګړې پر مهال د تعلیمي کال پیل کیدل
نوی تعلیمي کال پیل شو، خو په اوکراین کې زده کوونکي نه شي کولای د ښوونځیو په عادي ټولګیو کې کیني. په ځینو سیمو کې د امنیتي لاملونو له کبله ټولګي په تهکاویو، یا د مترو په تمځایونو کې جوړ شوي، لکه دلته په خارکیف کې.
انځور: Madeleine Kelly/ZUMAPRESS.com/dpa/picture alliance د دوبي رخصتۍ پای ته ورسېدې او همدارنکه په اوکراین کې د سپتمبر لومړۍ نیټه د ښوونځيو د پیل ورځ وه. آنلاین او یا هم په حضوري او انلاین بڼه ترسره کیدونکي زده کړې په ځینو سیمو کې د جګړې لومړیو کرښو ته نږدې پرتې دي. په خارکیف کې هڅې روانې دي چې د ماشومان لپاره د مترو په تمځایونو کې خوندي ټولګي جوړ کړي، څو په خوندي توګه زده کړي وکړي. د مترو تمځای کې یوه ښوونکې له یوې زده کوونکې سره ټولګي ته روانه ده.
په ټوله کې د اوکراین د شاوخوا ۳،۷ ملیونه زده کوونکو له پاره نوی ښوونیز کال پیل شو. همدارنګه د اوکراین ولسمشر ولودیمیر زیلینسکي هم ټولو زده کوونکو او ښوونکو ته د تعلیمي کال د مبارکي ترڅنګ هغوی ته د بریا ډک کال لرلو هیله څرګنده کړه.
یوه ښوونکې په ټولګي کې زده کوونکو ته ښه راغلاست وایي. ښوونکو ډیره هڅه کړې وه چې پر ناړوه شرایطو سربیره هم په ښایستو رنګونو سینګار کړي، څو ماشومانو ته د امکان تر حده ماشومانو ته یو ارام او له رنګونو ډک چاپیریال برابر کړي.
له درسي ټولګیو څخه د ښاروال لیدنه
د ښوونځي په لومړۍ ورځ د خارکیف ښاروال د مترو په تمځای کې جوړ شوي د ښوونځي یوي ټولګي ته ورغی. په ټوله کې ۶۰ درسي ټولګي جوړ شوي چې له زرو زیات زده کوونکي کولای شي په حضوري ډول دغو ټولګیو کې ګډون وکړي.
د توغندیو د بریدونو سربیره ښکلي صنفونه
په ګډه زده کړه او له ښوونکو سره په مستقیم ډول د نظر او معلوماتو تبادله په ځانګړي توګه د ماشومانو له پاره مهمه وي. د جګړې له پیل راهیسې، په لویو ښارونو کې ښوونځي دې ته دې مجبوره شوي چې په آنلان توګه تدریس پلان کړي. دا ځکه چې دا ښار د دې هېواد په ختیځه برخه کې د روسیې پولې ته څېرمه موقعیت لري او چارواکي ویره لري چې ښایي ښوونځي یو اسانه هدف وي.
د اوکراین د دوهم ستر ښار د مترو په تمځای کې د جوړ شوي ښوونځي د باندې د یوه ماشوم مور وايي چې «ماشومان به دې جوګه واوسي چې سره وویني او د خبرو کولو له پاره یوه ګډه ژبه ومومي.» دغه مور وایي چې هغه په بشپړ ډول د دې کار ملاتړ کوي.
هغه سروس چې زده کوونکي کورونو ته رسوي
د ښوونځي وخت پای ته ورسید او خپلو کورونو ته د تلو وخت دی. د رخصتۍ وروسته زده کوونکي هغه سرویس ته ورپورته کیږي چې د باندې دوی ته ولاړ دی. په دې ډول له په تهکاوۍ کې له ښوونځي څخه تر کوره د ماشومانو د رسولو دا خوندي لار ده.
