اوکراین وايي ۲۴ روسي ډرونونه ېې راغورځولي
۱۴۰۳ تیر ۱۶, شنبه
د اوکراین دافع هوا ځواکونو ویلي چې روسي ډرونونه ېې د اوکراین په ۱۲ سیمو کې راغورځولي دي.
د رويټرز خبري آژانس په حواله، د جمعې او شنبې تر منځ شپې د روسي ډرونونو حملې د اوکراین په شمال غربي سيمې سومي کې د انرژۍ پر تاسيساتو وشوې. د اوکراین دافع هوا ځواکونو ادعا کړې چې د سومي په ۱۲ سیمو کې ېې د ۲۷ روسي ډرونونو له ډلې ۲۴ ويشتلي دي.
په سومي کې د اوکراین د انرژۍ ملي ادارې ويلي چې په دغو حملو کې د انرژۍ تاسیساتو ته زیان اوښتی چې ترمیم چارې ېې پيل شوي دي.
په سملاسي توګه په سيمو کې د دغو حملو له کبله د ځاني او نورو احتمالي زیانونو په هکله جزئيات نه دي ورکړل شوي.
روسي ځواکونو د مارچ مياشت راپدېخوا د اوکراین د برېښنا پر سکتور خپلو بمباریو ته زور ورکړی چې په نتیجه کې ېې د اوکراین د حرارتي او آبي برېښنا په شبکو کې بې نظمي ایجاد کړې او په ځینو برخو کې د برېښنا اوږدې پرچاویانې وي.