د امريکا په متحده آيالاتو کې د انترنېټي خونديتوب کارپوهان دې ته هڅول شوي دي چې د عامې زېربنا د تاسيساتو او د دولتي کمپيوټري شبکو معاينه وکړي. دا له هغه وروسته کيږي چې د امريکا په وېرمونت آيالت کې د برېښنا د يوه شرکت په لاپټاپ کې داسې مضر سافت وېر يا پروګرام موندل شوی وو چې امريکايي چارواکي يې د روسي هېکرانو له خوا وراستول شوی بولي.
د بورلينګټن د برېښنا شرکت چې د وېرمونت آيالت يو له دوو دغه راز شرکتونو څخه دی، د جمعې په ورځ دا خبره تائيد کړې ده چې په يوه لاپټاپ کې يې د «ګريزلي سټېپ» په نوم د مضرو کمپيوټري پروګرامونو کوډ موندلی دی. دا هغه نوم دی چې د متحده آيالاتو حکومت يې د روسيې د ملکي او پوځي څارګرو ادارو له خوا سايبري فعاليتونو ته ورکړی دی.
د بورلينګټن د برېښنا د دپارتمنت وياند وويل چې فدرالي چارواکو دغه ګواښ نه يوازې د برېښنا شرکت ته متوجه او ورپورې محدود هم نه دی بللی. د متحده آيالاتو د داخلي امنيت وزارت ويلي دي چې په دې اړه هغسې معلومات په لاس کې نشته چې په دې دلالت وکړي چې د برېښنا د شرکت سيستم ته دې د انترنېټي عملياتو د لارې څوک ورداخل شوی وي.
د عامه ګټو د شبکو څارنه
د نيو يارک، رود آيلنډ، مسچوسېتس او کونېتيکټ چارواکو وويل چې هغوی به د دولتي او د عامې ګټې اخيستنې شبکې لا نژدې وڅاري څو په مشکوکو فعاليتونو کې ورپسې وګرځي.
د کونېتيکټ آيالت وياند، کريس کوليبي، وويل چې هيڅ مشکوک فعاليتونه تر سترګو شوي نه دي. په نيو يارک کې دموکرات والي، اندرېو کوومو ټولو دولتي ادارو ته امر کړی دی چې خپل کمپيوټرونه دې وګوري، خو کوم مشکوک شی پکې نه دی موندل شوی. د امريکايي چارواکو له خوا، پر يوې برېښنايي بټۍ باندې بريد همېشه ستر ګواښ بلل شوی وو.
د امريکا د ملي امنيت د اژانس مشر، مايکل روجرس لا مخکې خبرداری ورکړی وو چې دا سوال نه دی مطرح چې آيا بريد کوونکي به د امريکا د برېښنا پر سيستمونو باندې حمله وکړي که نه، بلکې دا چې کله به دا کار کيږي. د ۲۰۱۵ کال د دسمبر په ۲۳ مه يوه ډېره پياوړې سايبري حمله د يوکراين د برېښنا پر درېو سيمه يزو شرکتونو باندې تر سره شوه چې ۲۲۵ زره مشرتيان يې له برق څخه قطع او بې برخې کړل.
د رپوټ له لاري خبرداری
د بورلينګټن د برېښنا شرکت اوس وويل چې امريکايي چارواکو د پنجشنبې په ورځ د يوه رپوټ د لارې خبرداری ورکړی دی چې يو مضر ساتف وېر موندل شوی دی. دا هغه وخت و چې ولسشمر، بارک اوباما، د رياست جمهورۍ په انتخاباتو کې د شوو هېکري بريدونو په بدل کې پر روسيې باندې بنديزونه اعلان او وضع کړل.
که روسيه په دې ګرمه وبلل شي چې د متحده آيالاتو په عامه تاسيساتو کې يې کمپيوټري لاسوهنه کړې ده او دا خبره ثابته شي، نو منتخب ولسمشر، دونالد ټرمپ، به د روسانو ضد احساساتو په نرمولو کې له ستونزو سره مخامخ شي. د واشنګټن پوست ورځپاڼې تر ټولو مخکې د وېرمونت د پېښې په هکله رپوټ ورکړی وو. خو د روسيې دولتي تلويزيوني چېنل بيا ويلي دي چې دغې ورځپاڼې هيڅ داسې شواهد نه دي ورکړي چې روسيه دې پکې ښکېله وبلل شي.
بلې خوا ته بيا د امريکا د داخلي امنيت وزارت او فدرالي پوليسو، اف بي آی، په يوه رپوټ کې د حملو تخنيکي جزيات خپاره کړي دي او دغسې کړه وړه يې د يوه روان کمپاين يوه برخه ګڼلې ده چې هدف يې د امريکا د متحده آيالاتو حکومت او عام وګړي بللي دي.
پر ورته موضوع یو انځوريز البوم زموږ له آرشيف څخه (20.11.2016):
د امريکا ولسمشرۍ ته بریالی کاندید دونالد ترمپ چې له بارک اوباما څخه به د ولسمشرۍ واک ورسپارل کيږي، په خپل تير ژوند کې د مينې او یارانې ډیر سرګذشتونه لري. د نوموړي د ژوند د ښځو او کورنۍ انځوريز رپوټ دلته کتلای شئ:
انځور: picture-alliance/abacaدونالد ترامپ خپلو سيالانو ته تر ماتې ورکولو وروسته، د امريکا متحده ايالتونو په انتخاباتو کې د جمهوري غوښتونکو د ګوند رسمي کانديد وګرځيد. ترامپ چې د امريکا یو ناندريز ميلياردر دی، تر دې مخکې يې د لوړو ژورو ډګ مينه ناک ژوند لری دی.
په امريکا کې ولسمشرۍ لپاره ډیر لږ کانديدان داسې دي چې د خپل ګوند د غړو په منځ، ټولنه او حتې له هيواده بهر دې داسې جنجالي او ناندريز وي.( انځور: د ویسکانسن ايالت یو استاځي په کليولند کې د جمهوري غوښتونکو په کنګره کې د دونالد ترامپ له کانديداتورۍ څخه خپل مخالفت په ډاګه کړ).
دونالد ترامپ د ۱۹۴۶ کال د جون په ۱۴ مه نيويارک کې وزيږيد. هغه د فدريک ترامپ او مري آن مک لئود په پنځو اولادونو کې څلورم زوې دی. پلار ته یې د ميليونو ډالرو دارايي، د هستوګنځايونو د کاروبار له بابته ترلاسه شوي دي. ترامپ هم د خپل پلار لاره تعقیب کړه، حتې د پوهنتون په دوره کي یې د پلار په پيسو کورنو اخیستل او پلورل. په ۱۹۷۴ کې د لوړو زدکړو تر پاي ته رسيدو وروسته یې د پلار شرکت مسئوليت پر غاړه واخیست.
د ترامپ لمړنۍ ښځه چکي ماډله ایوانا مری زلنیچکوا وه. دواړو په ۱۹۷۷ کال کې واده وکړ. ترامپ له دغه واده څخه دوه زامن او يوه لور لري.
د هغه مشر زوی دونالد ترامپ يونيور دی. دی ۳۸ کاله عمر لري او د دونالد ترامپ د سوداګريز شرکت معاون دی. انځور کې يونيور د خپلې ميرمنۍ وانسا سره.
ایوانکا ترامپ، د دونالد ترامپ ۳۴ کلنه لور ده. دا ترڅنګ د دې چې د پلار په سوداګريز شرکت کې معاونه ده، د بوټونو د خرڅلاو په برخه کې هم فعاله ده.
ايوانکا ترامپ له جارد کوشنر سره چې ۳۵ کاله عمر لري واده کړی دی. دغه ميرمن نه یوازې د کورنو په تجارت کې فعاله ده، بلکه د يوې ورځپاڼې د امتياز خاونده هم ده.
له ايوانا مري زلنيچکو څخه د دونالد ترامپ وروستی اولاد د هغه ۲۳ کلن زوی اریک ترامپ دی. دی هم تر څنګ د دې چې د پلار په سوداګريز شرکت کې معاون دی، د ترامپ د هوټلونو رئیس هم دی.
وروسته له هغې چې ترامپ له خپلې لمړنۍ ميرمنۍ څخه جلا شو له مارلا ماپلس سره یې واده وکړ. (له ۱۹۹۳ تر ۱۹۹). مارلا ماپلس چې یوه سندرغاړې وه له ترامپ څخه یې ۱۷ کاله کم عمر لرود.
ترامپ له مارلا ماپلس څخه یوه لور لري چې تیفانی نوميږي. نوموړې د مدلينګ او سندرو ویلو په برخه کې فعاله ده او روان کال له پوهنتون څخه فارغيږی. تیفانی د پلار په سوداګريز سيستم کې ځای نلري او د هغه تر نوماند کيډو د مخه، له خپلې مور سره په کالفورنيا کې اوسيده.
دونالد ترامپ له مار لا ماپلس څخه تر جلا کیدو وروسته، د يو لنډ وخت لپاره د کار لا بروني سره ملګرتيا لرله. هغې له ترامپ څخه تر جلا کيدو وروسته د نیکلا سارکوزي سره واده وکړ، چې بيا د فرانسې ولسمشر شو.
دونالد ترامپ له خپلې دويمې ميرمنۍ سره تر جلا کيدو وروسته، په ۲۰۰۵ کال کې له سلوانۍ ماډلې، ملانیا کناوس سره واده وکړ.
اوس د ترامپ لمسی او د هغه کشری ځوی «بارون ویليام» سره تقريباً همځولي دي. ویليام چې اوس ښوونځي وايي، له ملانیا سره د ترامپ د واده حاصل دی. ترامپ د اتو لمسيانو نيکه دی.
ترامپ د کورنو، هوټلونو او قمارخانو شرکتونو ترڅنګ، تر ۲۰۱۵ کاله پورې د «ان بي سي یونيورسل» رسنۍ سره په ګډه، د نړۍ د ښکلا ملکې د سياليو پروسې اختيار هم په لاس کې لرود.
ټولې هغه ښکلې ښځې چې تر تيرو کلونو پورې دونالد ترامپ سره په يوه لاره تللې، اوس، په ځانکړې توکه د انتخاباتو پر وخت ترامپ لپاره د سترو ستونزو لامل شوې. په ټولو نظرسنجيو کې په ډيره سلنه کې ثابته شوه چې ترامپ د «ښځو ښه نه راځي». په امريکا کې د رايو اکثريت ښځي تشکيلوي چې دغه رايې د هغه سيالې، هيرې کلينټن ته کارول شوي دي.
