د اروپايي ټولني کمېسيون په بروکسل کې اعلان وکړ چې سيراليون، لايبريا او گينا ته به د کابو يو ميليون يورو په ارزښت مرستي د هوا له لارې وليږدوي.

ويل شوي دي چي د بوينگ ۷۴۷ ډوله باروړنکي درې الوتکې به د جمعې په ورځ کابو سل ټنه د مرستي مواد چې په هغو کې حفاظتي جامې او درمل هم شامل دي، له امستردام څخه د سراليون پلازميني «فري تاون» ته وليږدوي.

دغه عمليات د ملگرو ملتونو د ماشومانو د مرستي ادارې، يونيسيف، له خوا رهبري کيږي. سر بيره پر دې اروپايي ټولنه غواړي چې په درو ميليونه يورو مرستو سره له ايبولا ځپلو سيمو څخه د ژغورني يو سيستم جوړ کړي، څرنگه چې د اړتيا په صورت کې په ايبولا اخته شوي د مرستې کارکونکي د ۴۸ ساعتونو په موده کې اروپايي روغتونو ته وليږدول شي.

د اروپايي ټولني د خپلو معلوماتو له مخې د نوموړې ناروغې له رامنځ ته کيدو راهيسي له ايبولا ځپلو هيوادونو سره يي د ۱۸۰ ميليونو يورو په ارزښت مرستي کړي دي.

دآلمان پوځ هم په هوايي مرستو کې برخه لري

د آلمان پوځ د تيري جمعې په ورځ ايبولا ځپلو سيمو ته د هوا له لارې خپلې مرستې پيل کړې: د آلمان د «ترانسال» ډوله الوتکې د سينيگال په پلازمينه، ډاکار څخه پنځه ټنه د مرستې توکي چې زياته برخه ېې درمل ول، د لايبريا پلازمينې «مونروويا» ته وليږدول.

د آلمان حکومت د سپتمبر مياشتي په نيمايي کي اعلان وکړ چې له فرانسې سره په گډه به ايبولا ځپلو سيمو ته د هوا له لاري مرستي ورسوي. د دغه پلان له مخې له ډاکار څخه به په پر له پسې توگه د ترانسال الوتکې لايبريا، سراليون او گينيا ته مرستي وليږدوي. په دې سره به په اونۍ کې څه د پاسه ۱۰۰ ټنه د مرستي مواد دغو سيمو ته وليږدول شي.

په ايبولا باندي څه د پاسه ۷۴۰۰ اخته کسان ثبت شوي دي

په افريقا کې د امريکا متحدو ايالاتو د کوماندويي عسکرو د ايبولا پرضد مبارزي له پاره ځان داسې چمتو کړی دی چي په لويدځه افريقا کې د هغوی پوځي عمليات يو کال دوام وکړي.

امريکايي جنرال ديويد رودريگيوز وويل: «خو د دغه ماموريت دوام په دې پوري اړه لري چې دغه ناروغي څه وخت تر کنترول لاندي راوستل کيږي. د ۳۲۰۰ پلان شوو عسکرو څخه تر اوسه پوري په لايبريا او سينيگال کې۳۵۰ تنه ځای پر ځای شوي دي.

د دغو عسکرو ډير ئې لوژستيکي او تخنيکي ماهران دي. ايبولا داسي ناروغي ده چې د وجود د مايعاتو له لاري سرايت کوي. د روغتيا د نړيوال سازمان د معلوماتو له مخې تر اوسه پوري دغي ناورغۍ۳۵۰۰ انسانان وژلي دي. په گينا، لايبريا او سراليون کې د ثبت شوو ناورغانو شمير ۷۵۰۰ ته رسيږي.