د ایران په خرمشهر کې خلک د ورځني ژوند له پاره اړ دي چې له مختلفو لارو ځانونو ته د څښاک اوبه پیدا کړي.

له ډیرې مودې راهیسې د ایران د خوزستان ولایت په خرمشهر او آبادان ښارونو کې د نل اوبه د څښاک وړ نه دي. په دې وروستیو میاشتو کې بیا وضعیت تر پخوا ډیر خراب شوی. د ایران په ټولنیزو رسنیو کې په خپرو شوو ویډیوګانو کې د نل په اوبو کې د خړو اوبو راتګ لیدل کیږي.

ویل کیږي چې په کورنو کې نصب شوې د اوبو د پاکولو ماشینونه هم له فعالیته لویدلي. سربیره پر دې د نل په اوبو باندې د بدن په مینځولو سره جلد وچیږي او د سترګو د سوځیدو سبب ګرځي. په دې وروستیو کې د بهمنشیر په نامه د ایران د رود اوبه تر داسې یوې اندازې مالګیني شوي دي چې اصلاً د استفادې وړ نه دي. په همدې او د اوبو سطحې د ټیټوالي له کبله د اوبو مزه خرابه او په اوبو کې خاورې لیدل کیږي.

د جون میاشتې په ۳۰ نیټه د ایران په خرمشهر کې د اوبو د کیفیت د خرابوالي له امله پر سړکونو لاریون په زورزیاتي اوښتی او خلک له امنیتي ځواکونه سره په شخړو کې ښکیل شوي. د ایران په ټولنیزو رسنیو کې د خپرو شوو انځورنو په اساس ایراني امنیتي ځواکونو له اوښکې بهوونکي ګاز او ډزو څخه هم کار اخیستی دی.

پر دې ټولو سربیره د ایران په ولسي جرګه کې د خرمشهر استازي عبدالله سامري په دې ښار کې د اوبو د هر راز ستونزې خبره درواغ ګڼلې او دویچه ویله فارسې ته یې په دې هکله وویل چې د خرمشهر اوسیدونکي په دې برخه کې هیڅ راز ستونزه نه لري.

سامري د اوبو د لاسته راوړلو له پاره د خلکو د اوږدو کتارونو په هکله وویل: «په خرمشهر کې خلک د اوبو په برخه کې ستونزه نه لري.»

د ایران په پارلمان کې د خرمشهر پر انکار سربیره د «مهر» په نامه د ایران یوې رسنۍ بیا د ابادان او خرمشهر په ښارونو کې د اوبو د حل کولو خبر ورکړی دی.

د «مهر» په نامه دغې ایرانۍ رسنۍ په آبادان او خرمشهر ښارونو کې د اقلیم بدلون او په دې ورستیو کلونو کې د «کارون» په نامه له رود څخه د اوبو د راتګ کمښت د دې ستونزې اصلي عوامل په ګوته کړي دي.

وړیا اوبه: د مهر په نامه دغې رسنې همدار راز لیکلي دي چې د خوزستان د والي غلام رضا شریعتي په امر د آبادان او خرمشهر ښارونو له ښاریانو څخه به د اوبو د دوو میاشتو پیسې وانه خیستل شي.

د خپرو شوو رپوټونو په حواله، په اوبو کې مالګې نه یوازې ښاریانو ته ستونزې پیدا کړي، بلکي د دوی په سیمو کې یې ونې هم وچې کړې دي.

دا په داسې حال کې ده چې دا یوازې د آبادان او خرمشهر ښارونه نه دي چې خلک يې د اوبو له کمښت سره لاس او ګریوان دي. د ایران د زده کوونکو رسنۍ د یکشنبې په ورځ داسې شمیرې او معلومات خپاره کړي دي چې پکښې په ټول ایران کې د اوبو د کمښت خبره شوې ده.

د ایران د «ایسنا» په نامه رسنۍ د رسمي سرچنیو په حواله ځینې شمیرې خپرې کړي دي. په دې شمیرو کې د ایران له ټولو ۱۱۵۷ ښارونو څخه ۳۳۴ ښارونه داسې دي چې د اوبو له سخت کړکیچ سره لاس او ګریوان دي. د هغو ښارونو د اوسیدونکو شمیر چې د اوبو له ستوزي سره مخ دي په مجموعي ډول شاوخوا ۱۷ میلیونو انسانانو ته رسیږي.