په دغو انځورونو کي د ايران د سمندري پوځ پر بېړيو باندي دافع هوا توغندۍ نصب او ښوول سوي دي، چي د هوايي پوځ جنگي الوتکي، څرخۍ الوتکي او اوبتلونه راکټونه فايروي.

خو د هغو اوږد واټن ويشتونکو راکټونو توغونه ځنډېدلې ده، چي په پلان کي ول د شنبې په ورځ به و توغول سي.

د ايران خبري آژانس څرگنده کړې ده، چي د سمندري پوځ مرستيال قومندان اميرالبحر محمود موساوي ويلي دي چي د اوږد واټن ويشتونکی توغندی به په راتلونکو ورځو کي وتوغول سي.

پخوا تر دې د ايران يوه بل خبري آژانس خبر ورکړی وو، چي د شنبې په ورځ اوږدواټنه توغندی له پلان سره سم و ازمويل سو.

ويل سوي دي چي په دوی کي داسي راکټونه هم سته چي تر۲۰۰۰ کيلومتره واټن پوري خپل نښان ويشتلای سي. د دې معنا دا ده، چي دغه راکټونه اسرائيل، عربي هيوادونه او يا هم په افغانستان کي د امريکا اډې په نخښه کولای سي.

ددغو پوځي تمريناتو په لومړۍ ورځ، ايران حتا گواښ وکړ، چي که ئې د نفتو پر صادراتو باندي بنديزونه ولگول سي، نو د هرمز تنگه سمندري لاره به په بشپړه توگه بنده کړي.

دا په داسي حال کي ده، چي اروپايي ټولنه پر ايراني نفتو د بنديز پر سر بحثونه کوي.

د ايران د سمندري پوځ عمومي قومندان حبيب الله سياري د سمندري پوځي تمريناتو پر وخت وويل، د هرمز تنگي د سمندري لاري تړل د ايران د اسلامي جمهوريت له پاره ډيره اسانه خبره ده:

«د ايرانيانو په اصطلاح دا داسي آسانه کار دئ، لکه د يوه گلاس اوبو څښل.»

د ايران تر دې گواښ وروسته امريکا سمدلاسه غبرگون وښود او وئې ويل، چي د هرمز د لاري تړل د زغملو نه دي.

امريکا ويلي دي، چي د سمندري پوځ څو جنگي بېړۍ ئې هرمز ته نزدې په گزمه بوختي دي او د اړتيا په صورت کي به د هرمز لار په زور سره بېرته خلاصه کړي.

د ايران گاونډي عرب هيوادونه، دغه موضوع په آرامه څاري او په دې اند دي، چي ايران به د هرمز لاره بنده نه کړي ولي چي دغه لاره په خپله د ايران له پاره د ښارگ معنا لري.

خو د وضعي په بېرته آرامولو کي د ايران د بهرنيو چارو د وزير علي اکبر صالحي د شنبې ورځي څرگندونو هم مهم رول و لوباوه.

صالحي په تهران کي د شنبې په ورځ وويل، چي ايران چمتو دئ د خپل اټومي پروگرام په هکله يو ځل بيا خبرو اترو ته حاضر سي.

آژانسونه/ احمد ولي اڅکزی
کتونکی:نجيب الله زيارمل