شربت ګله (افغانه مونالیزا) ايټاليا ته رسېدلې ده
۱۴۰۰ آذر ۵, جمعه![Afghanistan Sharbat Gula auf dem Bild von Steve McCurry](https://static.dw.com/image/36163918_800.webp)
د ايټاليا د لومړي وزير دفتر د پنجشنبې په ورځ خبر ورکړ چې «افغانه تبع شربت ګله روم ته رسيدلې ده.»
د آلمان خبري آژانس د ايټاليا د صدراعظم دفتر په حواله ليکي چې شربت ګلې په اګست مياشت کې واک ته د طالبان تر رسیدلو وروسته له افغانستان څخه د وتلو مرسته غوښتې وه.
نوموړې له افغانستان څخه د ايټاليا حکومت د تخليې پراخ پروګرام په لړ کې ايټاليا ته راوستل شوې ده. د ايټاليا حکومت په دغه پروګرام کې په شرایطو برابر افغانان ايټاليا ته راولي چې بیا په دغه هیواد کې منل او مدغم کیږي.
شربت ګلې هغه وخت نړیوال شهرت ته ورسیدله چې د ۱۹۸۵ کال په جون میاشت کې يې انځور د نشنل جيوګرافيک مجلې پر مخ خپور شو. شربت ګله چې هغه وخت د ۱۲ کلونو وه انځور يې په پاکستان کې د مهاجرو په یو
کمپ کې د عکاس ستيف مک کري له خوا اخیستل شوی وو. د شربت ګلې دغه انځور چې نړیوال شهرت ته ورسید د «افغان مونا لیزا لقب» يې ترلاسه کړ. د هغې انځور تر ډيره د کډوالو د سخت وضعیت د انعکاس ورکولو په موخه کارول کیده.
خو هغه مهال لا د شربت ګلې نوم، د «افغان ګيرل» یا افغانې نجلۍ په نوم یادیده.
په اګست کې واک ته د طالبانو تر رسیدلو وروسته په لسونو زره افغانان د تخليې پروګرام په لړ کې بهرنیو هیوادونو ته ووتل. له افغانستان څخه د وتلو دغه پروګرام لا هم ادامه لري. د تخليې په پروګرام کې هغه افغانان او د هغوی د کورنيو غړي راوښکل کيږي چې د تيرو شلو کلونو په جریان کې يې په افغانستان کې له بهرنيو ځواکونو سره کار کړی وي. په دغه پروګرام کې دغه راز تر يو حده پورې هنرمندان، د مدني ټولنې فعالان او د بهرنيو موسساتو کارکوونکي هم راويستل شوي دي.