اکثره آلمان په دې باور دي چې د میرکل ښې ورځي پای ته رسیدلي
۱۳۹۶ دی ۱۵, جمعه
د ۶۷ سلنه آلمانانو په آند انګلا میرګل نور د پخوا په شان مشره نه ده، خو هغوی یې بیا هم بدیل نه ویني. یوه نوې سروې ښيي چې درې پر څلورمه برخه آلمانان بارو لري چې اوس نو په مسيحي دیموکرات اتحاد کې د بدلون وخت دی.
انځور: picture-alliance/dpa/S. Stache
اعلان
په یوه نوې نظر پوښتنه کې چې د پنجشنبې په ورځ خپره شوې ده، راغلي دي چې نزدې دوه پر دريمه برخه آلمانیا فکر کوي چې د صدراعظمي انګلا میرکل، تر ټولو ښې ورځي نوري تيري شوي دي.
دغه نظر پوښتنه «دې ویلت ورځپاڼي» او ARD رسنۍ کړې ده. د نظر پوښتنې په پایله کې راغلي دي چې ۶۷ سلنه آلمانان فکر کوي چې انګلا میرکل نوره هغه پخوانۍ مشره نه ده.
خو دا په دې معنی نه ده چې آلمانانو په بشپړه توګه پر خپلې مشري باندې باور له لاسه ورکړی دی، ځکه نزدې ۶۵ سلنه پوښتل شوي کسان اوس هم په دې باور دي چې میرکل «ښه صدراعظمه» ده.
د نظر پوښتني پایله ښيي چې تر دې لویه ستونزه دا ده چې د میرکل په مسیحي دیموکرات اتحاد ګوند کې نور برجسته شخصیتونه نه شته او له همدې کبله دغه ګوند نه دی توانیدلې چې د صدراعظمې په توګه د میرکل تر۱۲کاله کار وروسته هم د هغې له پاره کوم بدیل نه دی وړاندي شوی.
درې پر څلورمه برخه آلمانانو ویلي دي چې اوس په مسیحي دیموکرات اتحاد ګوند کې «نوي پرسونل» ته اړتیا شته.
تر سلو ډیري ورځي خو بې حکومته
په نظر پوښتنه کې دې موضوع ته هم اشاره شوې ده چې که څه هم د آلمان له پارلماني ټاکنو نزدې ۱۰۰ ورځي تيريږي، خو بيا هم په پارلمان کې حاضر گوندونه نه دي توانېدلي چي نوی حکومت جوړ کړي. د آلمان پارلماني ټاکني د ۲۰۱۷م کال د سپتمبر مياشتي پر ۲۴ نېټه ترسره شوې.
په ټاګنو کې د میرکل مسیحي دیموکرات اتحاد او په بایرن ایالت کې يې متحد، مسیحي سوسیال اتحاد ګوندونه په ټاکنو کې په گډه ۳۲،۹ سنله رايي وگټلې، خو په دې نسبې کمزوره پایلي سره هغوی اوس د ایتلافي حکومت په جوړولو کې له ستونزو سره مخامخ دي.
په لومړی سر کې د میرکل ګوند له آزاد دیموکرات او زرغون ګوندونو سره په خبرو بوخت وو، څو په اصطلاح د جامایکا ایتلاف رامنځ ته کړي، خو دغه خبري اترې کومې پایلې ته ونه رسیدلې.
اوس یو ځل بیا له سوسیال دیموکرات ګوند سره د لوی ایتلاف د رامنځ ته کولو په موخه روانې دي. که څه هم یو لوی ایتلاف ښایي له اقلیت حکومت څخه د خلاصیدو یوازینۍ لار وي، خو آلمانان دغه ایتلاف ته ډیر سترګې په لار نه ښکاري. نزدي ۴۵ سلنه آلمانانو ویلي دي چې هغوی د یوه لوی ایتلاف ملاتړي دي، خو۵۲ سلنه نورو بیا ویلي دي چې په دې اړه کوم نظر نه لري.
dpa,afp(M.J/N.Z)
زموږ له ارشيف څخه:
د میرکل اوږد سیاسي سفر په انځورونو کې
انگلا میرکل څرنگه د پخواني ځتیځ آلمان له یوې مذهبي کورنۍ څخه ځان د آلمان تر ټولو مهم او لوړ دولتي پوست ته ورساوه؟ کیسه یې په دغو انځورونو کې ولولئ.
انځور: Reuters
میرکل د آلمان د سیاست په ډگر کې لومړی د محافظه کار گوند تر رهبري ورسیده او بیا د آلمان صدراعظمه شوه. هغه تر اوسه پورې درې وارې پرله پسې لومړۍ وزيره ټاکل شوې او اوس يې پر دغه چوکۍ تقريبا ۹ کاله پوره کيږي.
میرکل له سیاسي لحاظه د ختیځ آلمان په اپوزیسیون کې فعاله شوه. د ختیځ او لویدیځ آلمان تر یوځای کیدو وروسته د هغې گوند له مسیحي دیموکرات اتحاد (CDU) سره یوځای شو. د آلمان د هغه وخت صدراعظم هلموت كول له میرکل څخه ملاتړ وکړ او هغه ته یې په خپلې کابینې کې کار ورکړ.
انځور: Reuters
میرکل په CDU کې ډیر پرمختگ وکړ او د دې گوند مشره شوه. کله چې دغه گوند په ۲۰۰۵ کال کې له سوسیال دیموکراتانو سره لوی ایتلاف وکړ، هغه د آلمان لومړۍ ښځینه صدراعظمه شوه.
انځور: Reuters
میرکل د آلمان، اروپا او نړۍ په سیاسي ډگر کې قوي څرگنده شوې ده. هغې د اروپايي مالي کړکیچ پر مهال له خپل موقف سره د آلمان له گټو څخه دفاع وکړه. د هغې منتقدین نیوکه کوي چې میرکل ډیر سیاسي مانورونه ترسره کوي. په دې مورد کې هغوی په آلمان کې د امریکا متحده ایالاتو د جاسوسي بربنډونې د بیلگې په توگه یادوي.
انځور: Reuters
پوتین او میرکل دواړه یو له بل سره په آلماني او روسي ژبو خبرې کوي. داسې ښکاري چې د دواړ اړیکې ښې وي خو د کریمیا موضوع د دواړو هیوادونو اړیکې یو څه ترینگلې کړې دي.
انځور: picture-alliance/dpa
میرکل له خپل لومړي میړه نه بیله شوه. هغې بیا وروسته له یواخیم ساویر سره واده وکړ. که څه هم میرکل خپل اولادونه نه لري خو یواخیم له خپلې مخکینۍ میرمنې څخه دوه زامن لري. میرکل په برلین کې له خپل میړه سره په یوه اپارتمان کې ژوند کوي او پخپله خپله سودا رانیسي.
