په اکوادور کې په یوه زندان کې د بیلابیلو پیښو له امله په مجموعي ډول ۳۱ کسانو خپل ژوند له لاسه ورکړی دی چي د ۲۷ کسانو جسدونه د یکشنبې په ماپښین موندل سوي دي.
د زندان د څارنې د ادارې سنای (Snai) په حواله هغوی د ځړولو په نتیجه کې د ساه بندیدو له امله خپل ژوند له لاسه ورکړی دی. خو د هغوی د مړیني اصلي علتونه لا په دقیق ډول نه دي معلوم.سنای خبر ورکړی چې: «اړونده چارواکې د دغو پیښو د بشپړې پلټنې په حال کې دي.»
اړوند:رپوټ: د امريکا په زندانونو کي څه نا څه ۲ میلیونه کسان بندیان دي
د سهار له خوا لا چارواکو خبر ورکړ چې د ماخالا د ساحلي ښار په زندان کې د ناآرامیو له امله څلور زندانیان وژل سوي دي. لکه څنگه چې د اکواویستا ټلویزیوني رسنۍ رپوټ ورکړی دی، سربیره پردې ۳۴ کسان ټپیان سوي دي چې په هغو کې یو پولیس هم شامل دی.
د اکوادور په زندانونو کې د زورزیاتیو سختې پیښې
اکوادور له کلونو راهیسې په خپلو زندانونو کې په تکرار سره د زورزیاتیو د پیښو شاهد دی چې ډېر وخت له حده زیات ډک وي او د سیالو بانډونو یا ډلو له خوا کنترولیږي.
د دغو دښمنو ډلو ترمنځ په تکرار سره وحشیانه نښتې رامنځته کیږي چې ډېر وخت په لسونو کسان پکښي وژل کیږي.
امنیتي چارواکي ډېر وخت یوازې په دې هڅه کې وي چې زندانیان په توقیف خونو کې پاته وي، د هغوی د دیوالونو په منځ کې هغوی تر ډېره ځایه خپل سر ته پریښودل سوي وي. په دې وروستیو کې لا د نوموړي هیواد په جنوب کې پروت دغه زندان کې د یوه ساتونکي په گډون ۱۴ کسان ووژل سول.
په لاتين امريکا کې موجود د سيمې تر ټولو ستر زندان
د لاتين امريکا ايل سلوادور هېواد کې له اوږدې مودې راهېسې د جرمونو د لوړې کچې رپوټونه ورکول کیږي. ښايي همدا علت وي چې د سيمې تر ټولو ستر زندان هم هلته موجود دی. په دې زندان کې د نړۍ تر ټولو خطرناک مجرمين قيد دي.
انځور: MARVIN RECINOS/AFP/Getty Imagesد لاتين امريکا تر ټولو ستر زندان
د لاتين امريکا په تر ټولو ستر زندان کې دمګړۍ په لسونو زندانيان ورځې او شپې سبا کوي. دلته ټول زندانيان بې له توشکونو د وسپنې پر کټونو باندې ويده کيږي. د سختو امنيتي تدابیرو له وجې دباندې څخه هیڅوک زندان نه شي داخليدلی او زندانيان هم له چا سره د ليدلو اجازه نه لري. دلته ځيني زندانيان د عمري بند او ځيني د ۲۰۰ کلونو بند په سزا محکوم دي.
په «سي اي سي او ټي» زندان کې دمګړۍ تقريباً ۱۵۰۰۰ زندانيان ورځې او شپې سبا کوي خو دا زندان په اصل کې د ۴ زرو زندانيانو له پاره ځای لري. دا زندان چې امنيتي تدابیر یې ډېر کلک دي، د ولسمشر بيب بوکیلې، له خوا پر لاره د اچول شوي يوه داسې پروګرام برخه ده چې په ځانګړي توګه په جرمونو کې د ښکيلو ډلو سره د چلند له پاره ترتیب شوی دی.
په دې انځور کې د بيريو ۱۸ په نوم یوه جنايي بانډ غړی ليدل کیږي. هغه د ۲۰۰ کلونو بند په سزا محکوم شوی دی. د فرانسې خبري آژانس په حواله د زندان مشر بيلارمينو ګارسيا، دلته پراته زندانيان رواني ناروغان بللي او ویلي یې دي چې همدا علت دی چې دا ټول مجرمين دلته زنداني دي ځکه له دې ځايه تېښته کول کابو ناممکن کار دی.
زندانيانو ته د زندان په مرکزي دهلیز کې د ۳۰ دقيقو د وزرش په موخه د ورځې يو ځل له خونو څخه د وتلو اجازه ورکول کيږي. د زندان شا او خوا ۱۰۰۰ کارکوونکي، ۶۰۰ عسکر او ۲۵۰ پولیس د زندان د ساتنې مسئوليت لري او د څار د کمرو په مرسته زندانيان ۲۴ ساعته شيبه په شیبه څارل کيږي.
دباندې وتلو هیڅ لاره نشته
پر ورزش سربیره زندانيان هغه وخت هم له خپلو کوټو وتلی شي چې په محکمه کې یې د ويډيو لينک له لارې استماعیه غونډه وي. د سيکو، په نامه يوه ۴۱ کلن زنداني رسنيو ته ويلي ول چې دی پر خپل له تشدد څخه پر ډک ماضي ډېر متاسف دی. هغه ويلی ول: «موږ پوهیږو چې له دې ځایه د وتلو هیڅ لار نشته.»
د بې ګناه کسانو نیول او بیرته آزاديدل
په ايل سلوادور کې د بې ګناه کسانو نیول کیدل کومه نوې خبره نه ده. د تېر کال په نوامبر میاشت کې ولسمشر نيب بوکيلې، منلې وه چې په نيول شويو کې ۸ زره بې ګناه کسان هم شامل دي خو ويلي یې وو چې دغه کسان بیرته آزاد کړل شوي دي.
