له لېرې لارې د محاسبې سپوږمکۍ (پارس ۱) چې د روسیي توغوونکي سایوز له خوا د واستوچني فضایي اډې څخه وتوغول شوه ۱۳۴ کیلوګرامه (۲۹۵ پونډه) وزن لري او په دریو کمرو سمبال ده.
د واستوچني فضايي اډه چې په ۲۰۱۶م کال کې فعاله شوه، د روسیې په ختیځ کې د آمور په سیمه کې موقعیت لري، دغه اډه له چین سره په پوله د ولادي واستوک بندر په شاوخوا ۱۵۰۰ کلیومرتۍ کې پرته ده.
د ایران د مخابراتو او معلوماتي ټکنالوژۍ وزیر عیسی زارع پور، د دغه هېواد دولتي ټلویزیون ته وویل: «د دې له پاره چې زموږ اوسنیو فضايي اډو د لمر په ۹۸ درجو مدارونو کې د سپوږمکۍ د لېږدولو توان نه درلود، د پارس ۱ سپوږمکۍ د روسیې له اډې څخه وتوغول شوه.»
د ایراني رسنیو د معلوماتو پر بنسټ، پارس ۱ سپوږمکۍ یوه څېړنیزه سپوږمکۍ ده چې د ډيزاین، جوړیدو، چمتو کیدو او آزمویلو کارونه یې د ایران د فضايي څېړنو په انستیتوت کې شوي دي.
رسنیو راپور ورکړی دی چې دا سپوږمکۍ درې عکس اخیستونکي کمرې لري او«د ځمکې د سرچینو په اړه معلومات په دریو مرحلو کې ترلاسه کوي».
ویل کیږي چې د دغې سپوږمکۍ لنډ موج چې رنګه طیف لري کولی شي په سلو ورځو کې د ایران شاوخوا ۹۵ سلنه ځمکې انځورنه واخلي.
دغه راز تود دوربین یې کولی شي په شپه کې له ۴۵ ورځو نه په کمه موده کې د ټول ایران عکسونه واخلي.
روسیې د خیام په نوم، له لېرې لارې د محاسبې سپوږمکۍ په ۲۰۱۶ کال کې د قزاقستان د بایکانور فضایي اډې له لارې د ځمکې مدار ته واستوله.
دغه کړنې د دواړو هغو هیوادونو تر منځ د ژورو اړیکو څرګندونه کوي چې د امریکا په تحریمونو کې دي.
د سنتينل سپوږمکۍ د لارې اخيستل شوي د ځمکې د کُرې انځورونه
د اروپايي ټولنې د ځمکې د څېړنې پروګرام کوپرنيکوس نوميږي. تر ۲۰۲۱ م کاله پورې به ۲۱ سنتينل سپوږمکۍ فضا ته توغول شوې وي. د ځمکې د نړيوالې ورځې په پلمه د درو لومړنيو سنتينل سپوږمکيو له خوا اخيستل شوي ښايسته انځورونه ووينئ.
انځور: ESA/Copernicus Sentinel data 2015په دغه عکس کې د فرانسې د مديترانې د سمندر غاړه ګورئ. د فرانسې په کان ښار کې د کوپرنيګوس پروګرام له پاره د سنتينل سپوږمکيو مهم توکي جوړيږي. د ايربوس شرکت هم ځينې پرزې په اختيار کې ورکوي.
د ۲۰۱۴ او ۲۰۱۶ کلونو په ترڅ کې درې سنتينل سپوږمکۍ فضا ته وتوغول شوې. د دريمې سنتينل سپوږمکۍ له خوا اخيستل شوی دغه انځور د نيل سيند او د نژدې ختيځ يوه برخه ښېي. د سنتينل په نوم سپوږمکۍ هغه انرژي اندازه کوي چې د ځمکې د سطحې څخه پورته کيږي.
دغه ډېر دقيق انځور د سعودي عربستان د ساحل په اوږدو کې په سره سمندر کې د مرجانو غونډۍ ښېي. د سنتينل سپوږمکيو د انځورونو کيفيت د پخوانو سپوږمکيو په پرتله ډېر ښه دی. په دغو انځورونو کې ونې، بوټي، سيندونه، لښتي او ساحلونه په دقيق ډول څېړل کېدلی شي.
دغه عکس وروسته رنګ کړل شوی دی چې په سودان کې د خرطوم سويلي برخه ښېي. په ښي پاسني اړخ کې د نيل سيند يوه څنډه ليدل کيږي. سره ټکي د سيند په اوږدو کې بوټي ښېي. رنګ وروسته ورکړل شوی دی څو له عکسونو څخه سم تعبير واخيستل وشي.
په دغه عکس کې د لويديځې افريقا سيرا لېون هېواد ليدل کيږي. پلازمېنه فريټاون يې د انځور په لاندنۍ برخه کې په نيمه ټاپو کې قرار لري. اقتصادي چارې يې د ژورو اوبو په طبيعي بندر پورې تر ډېره تړلې دي. د اروپا د فضايي ادارې څېړونکي وايي چې ګرد چاپېره جوړ شوي ښارګوټي اوس بندر ګواښي ځکه چې د ښارګوټو د جوړولو له پاره ځنګلونه وهل شوي دي.
د يوما ښار څلورکونجه جوړښتونه
د سنتينل سپوږمکيو ډېر شمېر عکسونه هنري ارزښت لري. په دغه انځور کې د امريکا متحده آيالاتو په اريزونا آيالت کې پروت د يوما ښار ليدل کيږي. دغه ښار د مکسيکو له پولې سره څېرمه پروت دی.
د آرال سمندرګی په ورکېدو دی
دا د آرال په نوم سمندرګی دی چې د درو سنتينل سپوږمکيو له عکسونو څخه يو ځای شوی دی. د اروپا فضايي اداره وايي چې د آرال سمندرګی «د دې له پاره اصلي ثبوت دی چې بشر څه ډول اغېزې پر چاپېريال او طبيعي سرچينو باندې لري.» د ۱۹۶۰ کال راهيسې يې د ډېر استعمال د وجې ۹۰ سلنه اوبه له لاسه ورکړې دي.
دغه انځور د آلمان پلازمېنه برلين ښېي. سړی ليدلی شي چې دغه ښار څومره زرغون دی چې په لويديځ کې يې د تېګل او وان به نوم ډنډونه قرار لري. د انځور په لاندنۍ منځنۍ برخه کې پخوانی هوايي ډګر ليدل کيږي. که نور د سپوږمکۍ له خوا اخيستل شوي انځورونه ليدل غواړئ، نو لاندې ويبپاڼې ته مراجعه وکړئ: www.esa.int/spaceimages/Images
