په ایرانکې د تسنیم خبري اژانس د جمعې په ورځ (د ۲۰۲۳ کال د دسمبر ۲۹مه) راپور ورکړی چې زرګونه هغه افغان اتباع چې په ایران کې یې د اوسیدو قانوني اسناد نه درلودل، له دغه هیواده ایستل شوي دي. د هغو شمېرو پر بنسټ چې وړاندې شوې د تېرې یوې میاشتې په ترڅ کې څه باندې ۶۰ زره کسان له ایران څخه افغانستان ته راستانه شوي دي.

د ملګرو ملتونو د معلوماتو له مخې دا مهال په ایران کې شاوخوا ۳،۵ میلیونه افغان کډوال ژوند کوي چې یو زیات شمېر یې د اوسېدو قانوني اسناد نه لري.

په افغانستان کې د طالبانو له بیا واکمنۍ وروسته د افغانانو یوه بله لویه څپه ګاونډیو هیوادونو پاکستان اوایران ته کډوال شول.

ډیری افغان کډوال په هغو سکتورونو کې کار کوي چې لږ معاش ترلاسه کوي. د بیلګې په توګه، دوی په لویو ښارونو کې په ساختماني سکتورونو کې کار کوي.

د افغانستان بل گاونډي هیواد پاکستان په دې وروستیو کې په زرگونو افغانان په زوره خپل هیواد ته استولي دي. په دې وروستیو کې په اسلام اباد کې د دغه هېواد حکومت هغو افغانانو ته چې له قانوني اسنادو پرته په خپله خوښه له پاکستانه ووځي، ضرب الاجل وټاکه.

په پایله کې د روان کال له پیله تر ۴۰۰ زرو ډېر افغانان له پاکستانه وتلي او خپل هېواد ته ستانه شوي دي او دغه شمیرې ورځ تر بلې د لوړیدو په حال کې دي. ډیری افغان کډوالو له دې ویرې چې پاکستان به یې په زوره له دغه هېواده وباسي، په خپله خوښه افغانستان ته ستانه شول.