د ټرانسپورت او هوايي چلن وزارت پر ایکس شبکې خپرې کړې خبرپاڼې کې ویلي، چې العربیه للطیران (ایر عربیه) شرکت نن چهارشنبه کابل ته لومړنۍ الوتنه ترسره کړه.

یاد وزارت زیاته کړې چې تر دې وروسته به یاد هوايي شرکت کابل ته په عادي ډول خپلو الوتنو ته دوام ورکوي. څه موده وړاندې فلای دوبۍ شرکت هم کابل ته الوتنې پیل کړي وې.

د ۲۰۲۱ کال اګست پر افغانستان د طالبانو له بیا ځلي واکمنېدو راوروسته بهرنیو هوايي شرکتونو افغانستان ته خپلې الوتنې بندې کړې وې.

د نړیوالو الوتنو بندیدو افغانستان کې او له افغانستانه بهر افغانان له ګڼو ستونزو سره مخ کړي. په داسې حال کې چې لا هم د طالبانو اداره د نړۍ هېڅ هېواد په رسمیت نه ده پېژندلې؛ خو وخت ناوخت د نړۍ له مختلفو هېوادونو سره د دغې ډلې د سفارتي او اقتصادي اړیکو خبرونه ورکول کېږي. «اير عربيه» هوايي شرکت د متحده عربي اماراتو په شارجه کې مقر لري او د ارزان بيه پروازونو زمينه برابروي، د تېر کال ډیسمبر کې یې د یوې خبرپاڼې په خپرولو سره کابل ته د پروازونو د پیلولو خبر ورکړی و.