د سیسیل سیمه ایزو چارواکو ویلي دي دغه ښځه د لامپيدوسا ټاپو د تازه راتلونکو مهاجرو په یوه کمپ کې وه. دغه کمپ د شاوخوا ۱۰۰ تنو له پاره جوړ شوی وو، خو په دې وروستیو ورځو کې په کښې ۱۰ برابره زیات کسان اوسیدل.

دا چې د دې ښځې د کرونا ویروس ټیسټ مثبت وو، نو چارواکو پریکړه وکړه چې دا د سیسیل ټاپو په مرکز کې د پالرمو ښار روغتون ته انتقال کړي، څو خپل ماشوم په مصئون ډول وزیږوي، خو اوبه له ورخه تیرې وې.

د سیمه ایز حکومت ویاند رویټرز ته ویلي دي چې دغې ښځې د سیسیل سویلي ساحل په فضاء کې په چورلکه کې خپل ماشوم زیږولی دی.

په دې وروستیو کې د سیسیل د سیمه ایز حکومت او د ایټاليا د مرکزي حکومت ترمنځ د مهاجرو پر موضوع اختلاف رامنځته شوی دی. د سیسیل والي پر مرکزي حکومت انتقاد کوي چې هغو مهاجرو ته د رسیدګۍ له پاره چې له افریقا څخه دې ټاپو ته را رسیږي کافي امکانات د دوی په اختیار کې نه ورکوي.

د هغو کسانو شمیر چې په دې وروستیو کې د مدیترانې په خطرناک قاچاقي مسیر ځانونه اروپا ته رسوي یو وار بیا زیات شوی دی.

د رسمي شمیرو له مخې د روان میلادي کال له پيل راهیسې تر اوسه پورې ۱۹۴۰۰ مهاجرو ځانونه د ایټاليا سواحلو ته رسولي دي. دا په داسې حال کې ده چې دغه شمیر د تیرکال په همدې موده کې ۵۲۰۰ وو.

د  (Sea Watch)خیریه سازمان اعلان کړی دی چې ۳۰۳ تنه ژغورل شوي مهاجر به ډیر ژر پالرمو ښار ته ورسیږي او په یوې کښتۍ کې به قرنطين شي. د دغو مهاجرو را رسیدل یو وار بیا د «لګا» ښي اړخي ګوند د مشر ماتئو سالویني له نیوکو سره مخامخ شوی دی.

سالوينې په فیسبوک کې لیکلي دي: «که حکومت دغو خلکو ته د داخلیدو اجازه ورکړي، د لګا ګوند به په غیر قانوني مجازاتو کې د لاس درلودونې او مرستې په دلیل د حکومت پر ضد اقامای دعوی وکړي.»

آژانسونه: ش.ن/ ن.ز