په شمال ختیځ بادغیس ولایت کې ځايي حکومتي چارواکو ویلي چې د دې ولایت په قادس ولسوالۍ کې یو کس چې قرآن کریم یې سوځولی وو او په تیښته بریالی شوی وو، وروسته د یوه نامعلوم کس له لوري په ډزو وژل شوی دی. د دې ولایت پولیسو هم د دې پیښې پخلی کړی دی او زیاتوي چې پیښه تر څیړنې لاندې ده.

د محلي رسنیو د رپوټونو له مخې، نوموړي کس چې احتمالاً د مسلمانانو مقدس کتاب قرآن شریف ته یې اور اچولی، تر پیښې وړاندې له خپلې میرمنې سره لفظي شخړه هم کړې وه.

په افغانستان کې مذهب ته سپکاوی یوه حساسه موضوع ده او کله چې پر کوم چا د دغه راز کار تور پورې شي بیا د نورو سخت دریځو کسانو له خوا په نخښه کیږي او په زیاتره مواردو کې له څیړنو او عدلي ارګانونو پرته خلک قانون په لاس کې اخلي.

په ۲۰۱۲م کال کې د افغانستان پلازمینه کابل کې وروسته له هغې د ناټو پر ستر پوځي مرکز برید وشو کله چې په یاده پوځي اډه کې د قرآن شریف د اشتباهي سوځیدو راپورونه خپاره شول. هغه مهال د خونړیو اعتراضونو په نتیجه کې د څلورو امریکایانو په شمول لسګونه کسان وژل شوي ول. مذهب ته د سپکاوي جرم نه یوازې په افغانستان بلکې په ګاونډي پاکستان کې هم یوه ډیره حساسه موضوع شمیرل کیږي.