د بامف نوي مشر هانس ایکهارد زومر د شپيګل مجلې د شنبې ورځې په ګڼه کې ويلي دي چې چارواکي بايد خپلواکه واوسي، حتي که ډیر سخت انفرادي کيسونه هم وي.
زومر وويل: «موږ بايد په دې برخه کې قانون او مقررات لا تقويه کړو. موږ همدا ډول دغه کار د ماليې په قانون کې هم ترسره کوو، يعنې هغه وخت چې يو کس د هغې له ورکړې څخه ډډه کوي.»
زومر د دې پوښتنې په ځواب کې چې آيا هغه يو قاطع انسان دی، وويل: «هو، د موجوده قوانينو مطابق عمل کول دا په خپله ماته د يو قاطع انسان لقب راکولی شي.»
زومر د روان کال په جون مياشت کې د بامف د پخوانۍ مشرې يوتا کورت تر لرې کيدو وروسته د دغې ادارې مشر وټاکل شو.
د آلمان د مهاجرت ادارې چارواکي وروسته له هغې تر پوښتنو لاندې راغلل کله چې په شمالي ښار بريمن کې د دغې ادارې په څانګه کې د مهاجرو د دوسيو اړوند يوه لويه رسوايي افشا او پوښتنې راپورته کونکي بحثونه يې رامنځ ته کړل. زومر په دې اړه وويل: «په بريمن کې چې څه پيښ شول، ناوړه خبره ده».
تحقيق کونکو د بامف ادارې د کارکونکو له ډلې څخه څو تنه چې په درنو او جدي تيروتنو او په اداري فساد کې ښکيل ول وموندل. د بريمن ښار د بامف ادارې د يوه داخلي تحقيق په پایله کې ۶۰۱ جدي پيښې وموندل شوې په داسې حال کې چې د يوې بلې ډلې تحقيق کونکو لخوا ۱۴۵ نورې پيښې هم کشف شوي دي.
د بامف ادارې مشر زياته کړه: «تر اوسه چې د نيمګړتياو کومې پيښې کشف شوې، دا د بامف ادارې د نورو څانګو په پرتله ډيرې متفاوتې دي.»
هانس ایکهارد زومر د آلمان د کورنيو چارو د وزير هورست زيهوفر د ګوند (سي اس يو) غړی دی او د پناه غوښتنې په چارو کې د سخت دريځ لرونکی دی. د رپوټونو پر اساس دی د همدې سخت دريځۍ له امله د بايرن ايالت په چارواکو کې په «سخت سپي» شهرت لري.
د آلمان د کورنيو چارو وزير د زومر د ګمارنې پر وخت ويلي وو چې د هغه په اړه دغه تصميم يې د شخصي «درک» له مخې نيولی دی.
له آرشيف څخه يو انځوريز البوم:
په آلمان کې د پناه غوښتونکو د دوسیو په برخه کې د فساد تورونو په اړه اړین معلومات
د آلمان د مهاجرت او پناه غوښتنې پر چارواکو تور دی چې د پناه غوښتونکو د ۱۲۰۰ قضیو په تائیدولو سره یې په فساد لاس پورې کړی دی. د چارواکو په وینا دغو مهاجرینو اړوند شرایط نه وو پوره کړي او په دې هکله پلټنې روانې دي. انځور: picture-alliance/dpa/D. Karmann د آلماني حکومتي چارواکو په وینا د فساد په دې پیښه ښکیل شپږ کسان تر پوښتنو او ګرویږنو لاندې دي. په دې کسانو کې په بریمن ښار کې د مهاجرت د ادارې پخوانی مشر، د بریمن او نیدر زاکسن ایالت درې وکیلان، یو ژباړونکی او یو شمیر نور کسان چې د وکیلانو او پناه غوښتونکو ترمنځ یې اړیکې جوړولې، شامل دي.
انځور: picture-alliance/dpa/J. Stratenschulte د دې ښار د مهاجرت د ادارې یا بامف پر پخوانیو چارواکو تور دی چې دوی د ۲۰۱۳ او ۲۰۱۷م کلونو په ترڅ کې د پناه غوښتنې ۱۲۰۰ قضیې چې په شرایطو نه وو برابر، تائید کړي. د دې قضیې زیاتره پناه غوښتونکي له سوریې څخه راغلي د یزیدیانو اقلیت پورې تړلي کسان دي.
انځور: Reuters/S. Loos رسنیو د یادې ادارې د داخلی اسنادو په حواله لیکلي چې پر دغو وکیلانو تور دی چې دوی پناه غوښتونکي دې ته هڅولي چې په بریمن کې د پناه غوښتنې عریضه وکړي چې په پایله کې یې د دوی د پناه غوښتنه منل شوې.
انځور: picture-alliance/dpa/B. V. Jutrczenka په اصل کې دغو پناه غوښتونکو باید په بریمن کې د پناه غوښتنې له پاره عریضه نه وای کړې. شک دا دی چې دوی د آلمان له نورو برخو څخه دې سیمې ته راوستل شوي وو ترڅو دلته عریضه وکړي په داسې حال کې چې یادې ادارې د دوی مسوولیت هم نه درلود.
انځور: picture-alliance/dpa/U. Zucchi د رسنیو د رپوټونو په حواله، د دغه راز ناسمو پریکړو چې د میاشتو راهیسې یې په هکله پلټنې روانې دي، شمیر ان تر ۲۰۰۰ پورې رسیږي.
انځور: picture-alliance/dpa/S. Pförtner د آلمان د کورنیو چارو وزارت تر دې پیښې وروسته اعلان وکړ چې د پناه غوښتنې د دغو پریکړو لړۍ به وارزول شي. د چارواکو په وینا د بامف ادارې پریکړې به هر څومره چې ژر امکان ولري له سره وارزول شي او د اړتیا په صورت کې به رد کړل شي.
انځور: picture-alliance/dpa/U. Deck د آلمان د کورنیو چارو وزیر هورست زیهوفر بیا د یوه خپلواک کمیسیون د جوړولو اعلان کړی ترڅو دغه پیښه وڅیړي. زیهوفر همدا راز ویلي چې د دې پیښې په هکله چې هرحکومتي چارواکی معلومات لري، کولی شي له هغه سره اړیکه ونیسي.
انځور: picture alliance/dpa/T. Hase ویل شوي دي چې د پلټنې د کمیټې لومړنی رپوټ په اوړي کې حکومت ته وسپارل شي.
انځور: picture-alliance/dpa/A. Weigel د آلمان د مهاجرت او پناه غوښتنې اداره یا «بامف» د دې هیواد د کورنیو چارو وزارت په چوکاټ کې فعالیت کوي چې مشري یې د تیرو ۱۳ کلونو راهیسې د مسیحي دموکرات او مسحي سوسیال اتحاد ګوند پر غاړه ده.
انځور: picture-alliance/dpa/G. Fischer په آلمان کې د پناه غوښتنې اړوند د ټولو دوسیو په هکله د بامف ادارې چارواکې پریکړه کوي. له پناه غوښتونکو څخه د همدې ادارې چارواکې معلومات اخلي او ورسره مرکه کوي.
انځور: Gina Sanders/Fotolia.com په ۲۰۱۵ او ۲۰۱۶م کلونو کې هغه وخت چې اروپا د مهاجرت له کړکیچ سره مخ وه، بامف یا د آلمان د مهاجرت ادارې په زرهاوو کسان په دندو وګمارل خو بیا هم په دې اداره کې په زرهاوو دوسیې پرته له پریکړې پاتې دي.
انځور: DW/R. Shirmohammadi
