ولسمشر جو بايدن د اوکراين په کړکېچ کې یوازې پر ديپلوماسۍ تکیه نه کوي. ظاهراً هغه د وضعيت د خرابيدو ویره لري. نوموړي په اوکراين کې له ميشتو امريکايانو غوښتي چې سملاسي دې له هيواده ووځي.
انځور: Patrick Semansky/AP Photo/picture alliance
اعلان
د امريکا متحده ایالاتو ولسمشر جو بايدن د اوکراين پر سرحد د روسي ځواکونو ځای پر ځای کیدو ته په اشارې سره وويل: «موږ دلته د نړۍ د سترو پوځونو له يوه سره یې مخامخ يوو.» هغه زياته کړه: «دا بيخي بل ډول وضعيت دی او په سيمه کې وضعيت په چټکۍ سره د ليونتوب لورې ته تلای شي.»
نوموړي له «ان بي سي» خبري شبکې سره په خبرو کې زياته کړه: «له همدې کبله امريکايي اتباع همدا اوس بايد له اوکراين څخه ووځي.»
بايدن په عين حال کې خپل روسي سيال ولاديمير پوتين ته امريکایي اتباعو ته د زيان له رسولو څخه خبرداری ورکړ. نوموړي وويل چې دی تمه لري چې پوتين به کله چې پر اوکراين بريد ته «په دې اندازه ليوال» وي، دومره هم هوښيار و اوسي چې داسې څه ترسره نه کړي چې هغه پر امريکايي وګړو اغیزه ولري.
اوکراين ته به امريکايي ځواکونه نه استول کیږي
خو ولسمشر جو بايدن پر خپلو اندېښنو سربيره هم پر دې ټينګار وکړ چې هغه به په هيڅ صورت کې امريکايي عسکر اوکراين ته ونه ليږدوي، آن د روسيې د يرغل پر وخت د امريکايي اتباعو د ژغورلو له پاره هم نه.
د هغه په خبره »که امريکايان او روسان يو پر بل باندي ډزي پيل کړي، موږ تاسي به په يوه بله نړۍ کي يوو.«
