د روسیې او اوکراین ترمنځ د ترينګلتياو تر زياتيدو وروسته امريکا پر روسيې د نويو بندیزونو لګولو خبر ورکړ. آلمان هم اعلان کړی چې له روسیې څخه آلمان ته د ګازو د انتقال پروژه یې درولې ده.
انځور: Chris Kleponis/CNP/picture alliance
اعلان
د امريکا متحده ایالاتو ولسمشر جو بایدن د اوکراین په ختیځ کې پر رامنځته شوي پرمختګ په څرګندو الفاظو کې غبرګون وښود. هغه وويل چې د روسیې له خوا پر خپل سر د نومول شويو «خلکو د جمهوريتونو» لوهانسک او دونيڅک په رسميت پيژندل او د اوکراين ختيځ ته د روسي ځواکونو د ليږدولو پلان د اوکراين د «اشغال پېل» دی.
بايدن په سپينه ماڼۍ کې د يوې وينا په ترڅ کې وويل: «موږ اوس هم په دې آند يو چې روسيه چمتو ده لا مخکې ولاړه شي او پر اوکراین دروند پوځي بريد پيل کړي.»
بايدن له اوکراین سره د نورو پوځي مرستو او سيمې ته د عسکرو د ليږدولو اعلان وکړ. هغه وويل: «امريکا متحده ایالات به په دې منځ کې له اوکراين سره نورې دفاعي مرستې هم وکړي او موږ به د ناټو خپل متحدين نور هم قوي کړو.»
بایدن زياته کړه چې د اضافي امريکايي عسکرو او تجهیزاتو حرکت ته یې اجازه ورکړې ده چې لا دمخه په اروپا کې مستقر دي. په دې توګه به اف – ۳۵ ډوله اته جنګي جټ الوتکې په آلمان کې له خپل مرکز څخه د «ناټو هيوادونو کيڼ لوري» په اوږدو کې ځای پر ځای شي.
همدا راز به په آلمان کې مستقر «ای ایچ – ۶۴» ډوله امريکايي جنګي څرخي الوتکې د بالتیک ساحې ته انتقال شي. خو بايدن په عين حال کې ټينګار وکړ چې هيواد او د لویدیځ متحدين یې د مخکې په څېر «ديپلوماسۍ» ته حاضر دي.
نوموړي په عين حال کې پر روسیې د نویو بندیزونو اعلان هم وکړ. پر دوو روسي بانکونو به بندیزونو پر خپل ځای پاتې وي او همدا راز به په مالي برخه کې هم د پام وړ اقداماتو ترسره شي.
