بايدن دغې پوښتنې ته په ځواب کې چې دغه رپوټونه رښتيا دي، د پنجشنبې په ورځ له ان بي سي رسنۍ سره په خپره شوې مرکه کې وويل: »نه، دا هغه څه نه دي چې ما ته ويل شوي دي«.

واشنګټن پوست ورځپاڼې هم په دې اوونۍ کې د پوځ له بېلابېلو قوماندانانو سره د خبرو په نتيجه کې رپوټ ورکړی چې په پوځ کې پروسږ کال د افغانستان د کړکېچ په مقابل کې د چلن په اړه د بايدن د حکومت په وړاندې لا ډېره غوسه موجوده ده. د نورو تر څنګ دغو قوماندانانو چې واشنګټن پوست يې خبرې راوستې دي، پر سپينې ماڼۍ او د بهرنيو چارو پر وزارت تور پورې کړی دی چې د تخليې ماموريت ته يې ډېر ناوخته چمتوالی نيولی او د تندلارو طالبانو برياوو څخه يې سترګې پټې کړې وې.

بايدن له تقريبا شل کاله جګړې وروسته د امريکايي پوځ له ناڅاپې وتنې څخه په تکرار سره دفاع کړې ده. د پنجشنبې په ورځ يې هم ټينګار وکړ چې »د وتلو له پاره مناسب وخت هيڅکله هم شتون نه درلود.«.

د هغه په خبره د پوځ بشپړې وتنې ته يوازنی بديل په افغانستان کې د سرتېرو د شمېر ډېرول وو. خو د بايدن په خبره »بيا بايد دغې ستومانونکې جګړې ته ورستانه شوي وای.«

په اګست مياشت کې له افغانستان څخه په ګډوډۍ سره وتل او ورپسې د تندلارو طالبانو له خوا بېرته د قدرت نيول، د متحده آيالاتو د زبرځواک له پاره يوه لويه ماته وه. د متحده آيالاتو د حکومت پر چلن په داسې حال کې چې طالبانو بېرته ولکه ټينګوله، د لويديځو متحدينو په منځ کې هم پر بايدن نيوکې زياتې کړې وې.

ن.ص./ن.ز.(AFP)