په ايتاليا کې پر افريقايي مهاجرو تر حملې وروسته، سیاسي ګوندونو په خپلو انتخاباتي کمپاينونو کې د مهاجرت موضوع ته لا زياته لمن وهي.

د یکشنبې په ورځ پر موټر سايکل سپور يوه ۲۸ کلن سړي د مهاجرو پر لور ډزې وکړې او شپږ افريقايي مهاجر يې ټپيان کړل. د ايتاليا د کورنيو چارو وزير مارکو مينيتي، په دې اړه وويل چې «دغې حملې د نژادپرستانه کرکې انګيزه لرله».

تورن کس چې نيول شوی او دا مهال په توقيف کې اوسيږي په اړه يې ويل شوي دي چې د ښي اړخو افراطيانو سره اړيکې لرلي. څيړونکو له هغه کور څخه چې د تورن مور او پلار په کې اوسيږي د نازيانو د مات شوي صليب نښان او همدا رنګه د ادولف هتلر «زما جګړه» په نوم کتاب موندلي دي.

د ايټاليا پخوانی لومړی وزير سيليو برلوسکوني، د دوشنبې په شپه په يوه تلويزيوني مرکه کې مهاجر ته د «ټولنيز بمونو» په خطاب سره وویل چې د «کيڼ اړخو» د حکومت په دوره کې له ۶۰۰ زرو څخه ډير مهاجر ايتاليا ته راغلي دي.

برلوسکوني د يادې پيښې په اړه د دوشنبې په ورځ وويل چې دغې حملې کومه سياسې انګیزه نه لرل، بلکه دا هغه څه دي چې يوازې يو ناروغ کس یې ترسره کولی شي.

پخواني لومړي وزير د خپل ګوند «فورزا ايتاليا» سره په انتخاباتي کمپايونونو کې د «ښې اړخي عوامپاله ليګ» سره ائتلاف کړی دی. اوس دغه د مهاجرو ضد ښې اړخې ډلې، له دا ډول پيښو څخه په انتخاباتو کې د لا زياتو رايو د ترلاسه کولو په موخه ناوړه ګټه پورته کوي.

د مهاجرو ضد د «شمال ليګ» له ګوند څخه ماتئو سالويني د دوشنبې په ورځ وويل چې «نه کنټرول شوي مهاجر، دغه ډول ګډوډي، غوسې او ټولنيزې ستونزې رامنځ ته کوي.»

ايټاليا د راتلونکې ميلادې مياشتې (مارچ) په څلورمه نيټه پارلماني انتخابات لري. د نظرسنجيو پر اساس، د برلوسکوني او سالوني ائتلاف تر نورو مخکښ دی.

/dpa reu xx n1 ik م.ک.ص