د فرانسې او بريتانيا د وچو تر منځ اوبه دي چي ورته د مانش کانال ويلي کيږي. دا چي بريتانيا له نوري اروپا سره مځکنۍ لاره نه لري نو د يورو تونل په نوم تر اوبو لاندي يو اوږد تونل په ۱۹۹۴م کال بشپړه سو.

دغه تونل تقريباً۵۰ کلومتره اوږد دی او د فرانسې و کالې ته نژدې سيمه د بريتانيا له کېنټ د ډوور سړک سره نښلوي. په دغه تونل کي موټر او اورګاډي د فرانسې او بريتانيا تر منځ تګ راتګ کوي.

خو په تيرو وختونو کي د يورو تونل د ډيرو دراماتيکو پيښو شاهد وو. په دې ترڅ کي يوه پېښه د سه شنبې په ورځ (۲۰۱۵م کال د جولای ۲۸مه) سهار وختي رامنځ ته سوې، چي خبر يې اوس ورکړل سوی دی.

د دغه خبر له مخي تقريبا ۲۰۰۰ پناه غوښتونکو په ډليزه توګه هڅه وکړه چي د يورو تونل ساحې ته داخل سي او له دغې لاري بريتانيا ته ځان ورسوي.

پناه غوښتونکي په کاله کي

د فرانس پريس خبري آژانس د ياد تونل د چلونکي شرکت د وياند په حواله ويلي دي چي د پناه غوښتونکو له خوا پر دغه تونل د هجوم وروړلو دغه په تيرو اونيو کي تر ټولو لويه پېښه ده.

د فرانسې په کاله سيمه کي له کوم ځايه چي تونل پيليږي، په زرونو پناه غوښتونکي موجود دي، چي هميشه کوښښ کوي د يورو تونل له لاري بريتانيا ته ځان ورسوي. هغه په دې هيله چي هلته به آرام ژوند وکولای سي.

په کاله کي د ايريتريا، حبشې، سوډان او افغانستان تقريبا ۳۰۰۰ پناه غوښتونکي موجود دي. هغوی د لاريو موټرو او يا هم اورګاډو په ډبو کي د ځان پټولو او په دې توګه په پټه ټوګه بريتانيا ته د ځان رسولو کوښښونه کوي. په دغو هڅو کي څو ځله پناه غوښتونکي وژل سوي او يا هم سخت ژوبل سوي دي.

۲۰۰ ساتونکي او پوليس

د يورو تونل وياند، د فرانسې خبري آژانس ته ويلي دي چي د سه شنبې په ورځ سهار وختي پر شپږ بجو باندي تقريبا۲۰۰۰ پناه غوښتونکو په ډليزه توګه هڅه وکړه چي د يورو تونل ساحې ته داخل سي.

د دغه وياند په وينا د تونل تقريبا ۲۰۰ ساتونکي او پوليسو د پناه غوښتونکو مخه ونيوله چي د يورو تونل ته داخل سي. د هغه په وينا دغه پېښه د دې لامل سوه چي د اورګاډو په بهير کي اخلال او ځنډ رامنځ ته سي.

د دغې سيمي له پاره د مسؤل پوليسو دفتر د هغو پناه غوښتونکو د شمېر په هکله معلومات نه دي ورکړي چي د سه شنبې په سهار يې دغه هڅه کړې وه.

خو ځينو چارواکو رويترز خبري آژانس ته ويلي چي په دغه هڅه کي ۶ پناه غوښتونکي ژوبل سوي دي. خو په رسمي توګه تر اوسه پوري دغه خبره نه ده تائيد سوې.

دومره زيات پناه غوښتونکي په داسي حال کي يورو تونل ته د ورننوتلو هڅه کوي چي د جولای مياشتي په منځ کي د بريتانيا د کورنيو چارو وزيري تېرېسا مې ويلي ول چي د يوې مياشتي په اوږدو کي تر ۸۰۰۰ زيات پوليسو د پناه غوښتونکو هڅي شنډي کړي چي د يورو تونل له لاري بريتانيا ته داخل سي.

حادثې په تونل کي

څو ورځي ترمخه دوه پناه غوښتونکي د يورو تونل له لاري بريتانيا ته د داخيلېدو په هڅه کي ووژل سول. يوه ايريتريايي ښځه په يورو تونل کي د موټر سره په ټکر کي ووژل سوه. او يو بل کس د اورگاډي په ډبه کي مړ وموندل سو.

د بريتانيا د کورنيو چارو وزارت تر مخه د ۱۵ ميليونو پونډو اعلان کړی وو چي د تونل په ساتنه به مصرفيږي. خو اوس ياد وزارت د ۷ ميليونو پونډو نوري پيسې هم د دغې موخي له پاره اعلان کړي دي.

دا په داسي حال کي چي د يورو تونل مسؤل شرکت د دې له کبله چي د پناه غوښتونکو له خوا يې د کار بهير ته تاوان رسېدلی دی، له بريتانيا او فرانسې څخه د ۹،۷ ميليونو يورو تاوان غوښتی دی.