په پام کې ده چې دغه پروسه د غیر حضوري مرکو پر ځای، ېوازې د پوښتنليکونو له لارې مخته وې وړل شي.
بريتانيايي رسنيو د پنجشنبې په ورځ د حکومت د یو سند پر اساس رپوټ ورکړی دی چې په راتلونکې کې به په زرونو پناه غوښتونکي حضوري مرکو ته و نه غوښتل شي، بلکې پر ځای به ېې پناه غوښتونکي یوه لنډ پوښتنلیک ترلاسه کوي.
ويل شوي دي چې دغه پوښتنلیکونه د افغانستان، اريتریا، لیبيا او سورېې هیوادونو پناه غوښتونکو ته استول کيږي.
مرتبط مطلب: بريتانيا د څو افغان خبریالانو پر انتقال له سره فکر کوي
د بريتانيا د کورنيو چارو وزارت ويلي دي چې که چېرته پناه غوښتونکي دغه پوښتنلیک ته ځواب ور نه کړي، په هغه صورت کې به هغوی دې ته اړ شي چې د پناه غوښتنې درخواست ېې بېرته واخلي.
د ګارډين ورځپاڼې د رپوټ پر اساس، په دغه پوښتنلیک کې ۵۰ پوښتنې دي چې باید ورته په انګليسي ژبه ځوابونه ورکړل شي. پناه غوښتونکي د پوښتنلیک د ترلاسه کولو وروسته شل ورځې وخت لري تر څو د پوښتنلیک پوښتنې بشپړې او بېرته ېې چارواکو ته وسپاري.
مرتبط مطلب:تر ۱۶۰ ډیر کسان په انګلیس کانال کې له ډوبیدو ژغورل شوي
تېر میلادي کال د هغو افرادو شمیر چې د پناه غوښتنې درخواستونو په اړه ېې د بریتانیا چارواکو پریکړو ته منتظر ول، څه باندې ۱۶۰ زرو ته رسيده. د ۲۰۲۲م کال د ډسمبر میاشتې تر ۳۱مه پورې په دغه هیواد کې مجموعاً ۱۶۰ زره او ۹۱۹ کسانو د پناه غوښتنې درخواستونه وړاندې کړي ول. له دغې جملې څخه لوړ اکثریت یعنې ۱۰۹ زره او ۶۴۱ درخواست کوونکي د چارواکو نهايي پريکړو ته منتظر ول.
مرتبط مطلب: انګلستان: ۱۵ کډوال تر آخ و ډب وروسته ونيول شول
د رپوټونو پر اساس، په بریتانیا کې د قبولۍ چانس د افغانستان، اریتريا، ليبیا او سورېې هیوادونو پناه غوښتونکو ته تر۹۰ سلنې هم ډېر وو.
بریتانيا ته تر ټولو ډیر غیرقانوني مهاجرتونه د مانش کانال له لارې کيږي.
تېر میلادي کال له اروپايي هیوادونو څخه تر ۴۵ زرو ډېر مهاجر د دغه کانال له لارې په کښتیو کې د بریتانيا خاورې ته داخل شول، چې دغه شمیر د یو کال مخکې هغه په پرتله ۱۷زره لوړ وو.
مرتبط مطلب:بریتانیا: په مانش کانال کې مړه شوو مهاجرو کې ښايي افغانان وي
د بريتانيا لومړي وزير ريشي سوناک، ژمنه کړې ده چې د پناه غوښتنې په کارونو کې د سستۍ او ځنډ راتلو ستونزې هواروي او په عین حال کې د غیرقانونی مهاجرو د کښتیو مخه هم نیسي.
دویچه ویله د/م.ک.ص./ن.ز.
له آرشیف څخه یو انځوریز البوم:
له ځنګل کمپ څخه پاريس ته او بيا ...
د فرانسې په کاله کې پولیسو لخوا د «ځنګل» موقت کمپ له ورانيدو وروسته، په زرونو مهاجر پلازمينه پاریس راوړل شول. خو لا هم زیات شمير مهاجر غواړي بيرته کاله ته ولاړ شي تر څو له هغه ځایه بريتانيا ته تللي وي. انځور: Reuters/C. Platiau پاریس کې د مهاجرو د خيمو غورځول د فرانسې پولیسو د پاریس ښار د ستالينګراد ميترو ستيشن ته نژدې د پياده روونو پر سر د مهاجرو درول شوې خيمې او د خوب لپاره هوارې کړل شوې دوشکې او بیسترې ټولې کړې. د کالې کمپ له ورانيډو وروسته پاريس کې د مهاجرو شمير تر ۳۰۰۰ پورې لوړ شو.
انځور: Reuters/C. Platiau دا به د کمپ د پاک کارۍ وروستی ځل وي؟ مهاجرې ښځې په سړه هوا کې بسونو ته ولاړې دي تر څو یې د فرانسې ښار بلې سيمې ته د مهاجرو د پزيرش مرکز ته رسولي وي. په پاريس کې د مهاجرو کمپ په وروستيو مياشتو کې هم دوه ځله پاک کاري شوی وو. د پزيرش مرکزونه به په راتلونکې کې د موقتي کمپونو د جوړيدو مخنيوي وکړي.
انځور: Reuters/B. Tessier په زرونو هغه مهاجر چې د «ځنګل» کمپ تر ورانيدو وروسته د فرانسې پلازمينې پاریس ته راغلي، په دې هيله دي چې بيرته کالي ته ولاړ شي، تر څو له هغه ځايه بريتانيا ته تللي وي.
انځور: picture-alliance/dpa/Y. Valat د فرانسې حکومت لخوا په کالې کې د مهاجرو کمپ تر ويجاړيدو وروسته، یو شمير مهاجرو د پاريس ښار په کوڅو کې خپلې خيمې ودرولې. له همدې کبله اوس د فرانسې په کوڅو کې د مهاجرو شمير زیات شوی دی.
انځور: Reuters/C. Platiau کوم مهاجر چې تيرکال فرانسې ته رسيدلي ول، اکثره یې د افغانستان، عراق، اريتيريا او سوډان هيوادونو څخه دي. دوي غالباً هڅې کړي تر څو د لاريو او نوور وسايطو په ذريعه د بريتانيا پر لور وتښتي.
انځور: Reuters/P. Rossignol يوه ډله ځوان مهاجر په کاله کې «ځنګل» کمپ ته نژدې ولاړ دي. د اکتوبر میاشت په ۲۶ مه، کله چې پوليسو له کمپ څخه د شاوخوا ۱۰ زره مهاجرو د وښکلو کار پیل کړ، کمپ ميشتو په اعتراض کې اورونو بل کړل.
انځور: picture-alliance/dpa/E. Laurent مهاجر له کالې څخه د وتلو په حال کې د فرانسې د کالې په «ځنګل» نومې کمپ کې شاوخوا لس زره مهاجر په دې اميد ميشت ول چې بريتانيا ته به ځي. چارواکو د فرانسې نورو سيمو ته د دغو مهاجرو د انتقال پر وخت هڅې وکړې، تر څو يې د اعتراضاتو د پيښيدو څخه مخنيوی کړی وي.
انځور: picture-alliance/AP Photo/T. Camus دا په کاله کې د «ځنګل» کمپ یوه برخه ده. په دغه کمپ کې مهاجر په ناپاکه کانتينرونو او خيمو کې په بد حالت کې ژوند کاوه. دغو خيمو د باد او لمر په مقابل کې ډیر کم مقاومت لاره.
انځور: Reuters/P. Wojazer د فرانسې ولسمشر فرانسوا اولاند وویل چې نور به څوک پرې نښودل شي چې د کالې د مهاجرو په کمپ کې له سره میشت شي. د «ځنګل»کمپ په اروپا کې د مهاجرو د بحران د سمبول په توګه بدل شو.
انځور: Reuters/C. Platiau
