د بریتانيا لومړۍ وزیرې تریسا مې د سه شنبې په ورځ وویل چې ۴۴۰ نور عسکر به هم افغانستان ته ولېږل شي. په دې سره به په افغانستان کې د بریتانوي عسکرو شمیر ۱۱۰۰ تنو ته لوړ شي.
زیاته شوې ده چې دوی به د ناټو په مشرتوب په هغه روزنیز ماموریت کې ونډه ولري، چې موخه یې د افغان ځواکونو روزنه ده. هدف دا دی څو له افغانستان سره د طالبانو او داعش پر ضد جګړه کې مرسته وشي.
ترمپ تیر کال اعلان کړی وو چې په زرونو نور امریکايي عسکر افغانستان ته استوي او د ناټو له شریکانو یې غوښتي ول، چې د ځواکونو د زیاتیدو په برخه کې ونډه واخلي. په دغه غونډه کې ترمپ د ناټو له غړو هیوادونو وغوښتل چې د دفاع په برخه کې لا زیاتې پيسي ورکړي. له دې کبله هغه په ځانګړې توګه پر آلمان باندې نیوکه وکړه.
په افغانستان کې شاوخوا ۱۳۰۰ آلماني عسکر مېشت دي او هغوی هم د ناټو د روزنیز ماموریت برخه دي.
زموږ له آرشیف څخه:
انځورونه: د افغانستان کوماندو ځواکونه څوک دي؟
د افغانستان د اردو هغه کسان چې ځانګړې وړتیاوې ولري او د سختې پوځي روزنې له بهیر څخه تیر شي، کوماندو یا ځانګړو ځواکونو ته جذبیږي. امریکا متحده ایالات غواړي چې د دغو ځواکونو شمیر دوه برابره کړي.
انځور: DW/S. Tanha
د افغانستان د اردو کوماندو هغه مخکښ سرتیري دي چې تر مخه په نورو برخو کې فعاله وو او ځانګړي قابلیتونه یې درلودل.
انځور: DW/S. Tanha
دغه ځواکونه د تروریزم ضد عملیاتو کې اغیزناک نقش لري او د افغانستان په خطرناکو سیمو کې ضربتي او تاکتیکي عملیات پر لاره اچوي.
انځور: DW/S. Tanha
د افغانستان د اردو چارواکي وایي چې ځواکونه یې له خاصو مهارتونو برخمن دي. اوس مهال د ځانګړو عملیاتو لویه برخه دغه ځواکونه پر مخ وړي.
انځور: DW/S. Tanha
د افغانستان د چارواکو په وینا یوازې د اردو د کوماندو نهم کنډک، د افغانستان په لویدیځ کې په روان کال کې تر ۲۰۰ پوځي عملیات تر سره کړي دي. څلور عملیات د هیواد په نورو زونونو کې ول او نور بیا د هرات، فراه، غور او بادغیس په ولایتونو کې تر سره شوي دي.
د افغانستان د دفاع وزارت په وروستیو کې اعلان وکړ چې اردو یې داسې عملیات تر سره کوي، چې یوه څلویښت کلنه اردو یې باید وکړي. دا په داسې حال کې ده چې د افغانستان د اردو له جوړیدو یوازې ۱۶ کاله تیریږي.
انځور: DW/S. Tanha
د افغانستان د اردو ځانګړو ځواکونو په شپنیو عملیاتو کې هم بریاوې لرلي دي. دغو ځواکونو د یاغیانو له منګولو څو وارې برمته شوي کسان آزاد کړي او د هغوی پټنځایونه یې له منځه وړي دي.
انځور: DW/S. Tanha
د افغانستان له پاره د امریکا متحده ایالاتو د نوې ستراتیژۍ له مخې، د دغو ځواکونو یو ماموریت د طالبانو پر مخدره توکو بریدونه دي چې طالبان ترې د خپل جنګي لګښتونو د تأمین له پاره استفاده کوي.
انځور: DW/S. Tanha
د امریکا متحده ایالاتو د دفاع وزارت د تروریزم پر ضد عملیاتو کې په کراتو د افغان ځانګړو او کوماندو ځواکونو وړتیاوې ستایلي دي.
په کابل کې تر وروستیو خونړیو بریدونو وروسته د افغانستان ولسمشر ویلي دي چې له طالبانو به یې هغې غچ واخلي. د متحده ایالاتو ولسمشر هم ویلي چې له طالبانو سره خبرې نه کوي او د یاغیانو پر سرکوبولو یې ټینګار کړی دی. په دې ترتیب د افغانستان کوماندو ځواکونو د شپنیو عملیاتو له پاره خپل چمتووالی ډیر کړی دی. لیکوال، انځورونه: شعیب تنها
