د آلمان جنایي ادارې د پنجشنبې په ورځ په ویسبادن کې اعلان وکړ چې پولیس توانیدلي۳۳۰ کلیوگرامه هيروئين کشف کړي.

دا په وروستیو لسیزو کې یو ځای نیول شوي تر ټولو ډیر هیروئین دي. په تور بازار کې د دغو موادو ارزښت ۵۰ میلیونه ډالرو ته رسیږي.

دغه ټول مواد په یوه لوی موټر کې ځای پر ځای شوي ول. چارواکي وایي چې نیول شوي هیروئین یې د روان کال د سپتمبر مياشتي پر ۲۲ نیټه له یوې محمولې څخه چې له ایرانه استول شوې وه نیولي دي. په دې بار وړونکي موټر کې بايد په اصل کې اچار لیږدول شوي وای.

د آلمان فدراله جنایي اداره له څو میاشتو راهیسي د هغي ډلي په اړه په څیړنې بوخته وه چې لویدیځي اروپا ته یې په زیاته اندازه مخدره مواد قاچاقول. دغه سوریايي ـ عراقي ډله له څو کلونو راهیسي تر شک لاندي وه. دغي ډلي په ترکارۍ کې مخدره مواد قاچاقول.

پر دوو نیول شویو ورونو سربیره هغه شرکتونه چې باید دغه محمولې ورته رسیدلې وای هم په پیښه کې شکمن بلل شوي دي.

آلماني چارواکو ویلي دي چې په دې قضیه کې پر ډیرو نورو کسانو هم شک موجود دی او دا چې اوس پولیس په څیړنه بوخت دی.

په دې اړه اوس څېړني رواني دي او نیول شوي کسان اوس په موقت حبس کې دي.

په یوه وار د ۳۳۰ کیلو گرامه هیروئینو نیولو په تیرو کلونو کې د څیړونکو د کار په اړه پوښتنې راپیدا کړي دي. په ټول ۲۰۱۳ کال کې آلماني پولیسو ۲۷۰ کیلو هیروئین نیولې ول.

د فدرال آلمان د جنایي پولیسو مشر یورگ تسیرکه، ویلي دي چې له دې کشف څخه معلومیږي چې تر دې دمخه هم آلمان ته د مخدره موادو لویې محمولې راتلې. هغه زیاته کړې ده چې له دې پدیدې سره د مبارزې په موخه نړیوال قاطعانه کار ته اړتیا شته.

تر دې دمخه د ۲۰۱۴ کال په لومړیو کې آلماني پولیسو د هیروئینو داسې محمولې نیولې وې چې په ډیر مهارت سره پټ شوې ول.

پولیسو د لايپڅيگ هوایي ډگر ته نژدې نهه ایرانۍ غالۍ نیولي وې چې ۴۵ کلیو گرامه هیروئین پکښې ځای پر ځای شوي ول.

په دغو غالیو کې هیروئین په ډیر مهارت سره ځای پر ځای سوي ول.

د لايپڅيگ هوایي ډگر ماموران هغه وخت شکمن شول چې غالۍ تر حد ډیري درنې وې.

په هري غالۍ کې پنځه گیلو گرامه هیروئین ځای پر ځای شوي ول.

دغه غالۍ هم د هوا له لاري له ایرانه را انتقال شوي وې.

په لايپڅيگ کې له ایران څخه د را انتقال شوو هيروئينو نيول.