د آلمان د بهرنيو چارو وزیره د سه شنبې په ورځ اسلام آباد ته ورسيده او د دغه هیواد له چارواکو سره ېې وکتل. تر دې وړاندې ويل شوي وو چې د آلمان خارجه وزيره به د سه شنبې او چهارشنبې په ورځو کې د پاکستان په پلازمينه اسلام آباد کې د دغه هیواد له صدراعظم، شهباز شریف او خپل پاکستاني سيال، بلاول بوتو زرداري سره خبرې اترې ولرې.

انالینا بیربوک د دوشنبې په ورځ ويلي ول چې هغه به په دغه سفر کې د نورو مسئلو تر څنګ له پاکستاني چارواکو سره له افغانانو سره د مرستې، آلمان ته د حفاظت په موخه د اړمنو افغانانو پر انتقال او د افغان ښځو د حقونو د رعایت له پاره پر طالبانو د فشار راوړلو پر ډېريدو خبرې وکړي.

میرمن بیربوک د سه شنبې په ورځ په اسلام آباد کې له خپل پاکستاني سيال بلاول بوټو زرداري سره په يو ګډ خبري کنفرانس کې پر نړيوالې ټولنې غږ وکړ چې باید په افغانستان کې د طالبانو رهبرۍ ته پيغام واستوي چې هغوی پر ناسم مسیر روان دي.

نوموړې د افغانستان پر اوسني وضعیت اندېښنه ښکاره او په دغه هیواد کې ېې د ېوې انساني فاجعې د پېښیدو خبرداری ورکړ. د آلمان خارجه وزیرې وويل: «دا چې په افغانستان کې څه پيښيږي په اړه ېې زموږ اغیز ډير محدود دی. دا پخپله په طالبانو پورې اړه لري چې د خپلو اقتصادي منافعو له پاره منطقي موخي انتخاب کړي، خو دا هغه څه نه دی چې دوی [طالبان] ېې ترسره کوي.»

بيربوک په خپلو خبرو کې زیاته کړه: «دا د افغانستان د خلکو ګناه نه ده چې حکومت ېې د طالبانو له خوا ړنګ کړل شو.»

د آلمان د بهرنيو چارو وزیره پاکستان ته له افغانستان څخه د حفاظت په موخه د ځينو افغانانو د رايستلو په پروسه کې د یو مهم شريک په سترګه ګوري.

هغې د خبري کنفرانس پر مهال زیاته کړه چې آلمان او پاکستان، د پاکستان له لارې د افغان مهاجرو د چټک انتقال له پاره خپل اړوند سیستمونه بيا تنظیم کړل او له دې لارې د تیرو څو میاشتو په جریان کې څه باندې ۱۴ زره افغانان په ځانګړې توګه هغه چې له خطر سره مخ ول وتوانیدل آلمان ته سفر وکړي.

بیربوک نن وويل چې برلین او اسلام آباد، آلمان ته د افغان مهاجرو د لیږد پروسې وخت رالنډ کړی دی.

د آلمان د بهرنيو چارو وزيرې د دوشنبې په ورځ پاکستان، يونان او ترکېې ته د خپل څلور ورځني سفر څخه د مخه اعتراف وکړ چې حفاظت ته د اړمنو افغانانو د تخلېې پروسه سسته روانه ده او تر څنګ ېې دا هم وويل چې د حل ساده او واقعاً د رضایت وړ لارې چارې هم موجودې نه دي.