تاجیکستان: تېره اوونۍ له افغانستانه په حملو کې ۵ تنه وژل شوي
۱۴۰۴ آذر ۱۰, دوشنبه
د تاجیکستان د ولسمشرۍ ماڼۍ مطبوعاتي دفتر د دوشنبې په ورځ خبر ورکړ چې د تېرې اوونۍ په جریان کې د ګاونډي هېواد افغانستان له لوري دوه حملې شوي چې په کې پنځه تنه وژل شوي او پنځه نور ټپیان شوي دي.
د تاجیکستان چارواکو تر دې مخکې په سرحدي لرو پرتو علاقو کې د مخدره موادو د قاچاق او د سرو زرو د غیرقانوني کېندنو په هکله خبرداری ورکړی وو. دغو چارواکو تېره اوونۍ وویل چې د افغانستان له خاورې د ډرون په حمله کې درې چینايي وګړي وژل شوي دي.
د ولسمشرۍ مطبوعاتي دفتر په یوه اعلامیه کې ويلي چې ولسمشر امام علي رحمان د وضعیت د ارزونې او د سرحدي امنيت د لاټينګښت په موخه د امنيتي ارګانونو له مشرانو سره کتلي دي.
په اعلامیه کې راغلي چې رحمان «د افغانانو غیرقانوني او پاروونکي اقدامات په کلکه غندلي او سپارښتنه ېې کړې چې د ستونزو د حل او د دا ډول پېښو د تکرار د مخنيوي له پاره اغېزمن اقدامات تر لاس لاندې ونیول شي.»
په افغانستان کې د طالبانو ادارې تر اوسه د تاجیکستان د څرګندونو په هکله څه نه دي ویلي. تر اوسه د دغو ادعا شوو حملو مسئولیت هم کومې ډلې یا کس نه دی منلی.
د طالبانو د بهرنيو چارو وزارت تېره اونۍ د افغانستان او تاجیکستان په سرحد کې د درو چینايي وکړو د وژنې په هکله ويلي ول چې د ترسره شوو پلټنو پر اساس، په دغه پېښې کې «هغه کړۍ لاس لري چې په سیمه کې د ګډوډۍ، بېثباتۍ او د هېوادونو ترمنځ د بېباورۍ رامنځته کولو لپاره هڅې کوي.»
که څه هم د طالبانو د بهرنیو چارو وزارت دغه حمله غندلې، خو په اعلامیه کې ېې نه دي ویلي چې دغه حمله د افغانستان له خاورې شوې که نه.
تاجیکستان یو غرنی هېواد او د پخواني شوروي اتحاد له جمهوریتونو یو دی چې شاوخوا ۱۱ میلیونه نفوس لري. که څه هم د افغانستان او تاجیکستان ترمنځ په تېرو څلورو کلونو کې مناسبات ساړه ول، خو په وروستیو کې د دواړو ګاونډیو ترمنځ سفرونه او لېده کاته شوي دي.