د ترکیې د کورنيو چارو وزير وويل چې د چهار شنبې په ورځ د دغه هېواد په ختيځ کې لږ تر لږه ۲۳ تنه هغه وخت ووژل شول کله چې د برف کوچ د قربانيانو د ژغورنې له پاره بيړنۍ عمله په کار بوخته وه. دې ژغورونکو هڅه کوله د تېره شپې د واورې ښوېدنې قربانيان وژغوري.

د ختيځ ايالت وان د باغچه سرای سيمې ښاروال وويل چې داسې انگيرل کيږي چې نور ۱۵ کسان تر واورې لاندې وي. زياته شوې چې د عاجلې ډلې غړي په خپلو همکارانو پسې لټه کوي چې د طبيعي ناورينونو د دولتي آژانس او د دې د ژغور د طبي ډلې غړي ول.

واورې، لړې او شمال د ژغورنې کار له خنډ سره مخامخ کړی دی.

د «اين ټي وي» شبکې د ښاروال له قوله ويلي دي چې د ۳۰۰ کسانو يوه ډله د سه شنبې د شپې د واورې ښوېدنې د قربانيانو په لټه کې وه چې د واورې لاندې بند پاتې ول. دغه لومړۍ واورې ښوېدنې ۵ کسان وژلي ول.

د چهار شنبې ماسپښين موده د واورې ښوېدنې په قربانيان پسې لټه روانه وه چې د واورې ښوېدنې يوه بله پېښه رامنځته شوه چې په دې توگه د وژل شويو ټول شمير ۲۸ ته لوړ شو.

ژغورونکي تر واورو لاندې شوي

د کورنيو چارو وزارت په يوه اعلاميه کې ويلي ول چې له دغه ژورې درې څخه تر اوسه ۳۰ کسان ژغورل شوي او روغتون ته انتقال شوي دي. خو وزارت د دغه کسانو د روغتيايي وضعيت په اړه نور معلومات نه دي ورکړي.

د ترکیې د کورنيو چارو وزير سليمان صويلو خبريالانو ته وويل چې د واورو څخه د ۱۱ ژغورونکو جسدونه رايستل شوي دي. زياته شوې ده چې په قربانيانو کې اته پوځي پوليس افسران او درې د سيمه ایز گارد غړي دي. گورنر محمت امين بلمز وويل چې د اطفایې يو غړی هم وژل شوی دی.

د اسوشيتد پريس خبري آژانس په حواله په يوه ويديو کې د واورو د طوفان پر وخت په يوه دره کې لږ تر لږه درې چپه شوې موټر ليدل کيږي. ځینو ژغورونکو د واورو څخه د ځان ژغورنې په موخه هڅه کوله يوې غونډۍ ته پورته شي نورو بيا د بيلچو او نورو اوزارونو په مرسته د وارو د لیرې کولو هڅه کوله.

لومړي برف کوچ د واورو د پاکولو يو موټر او همدا راز يو مني بس لاندې کړې ول، خو ټول مسافرين او د واورې پاکولو د موتر چلونکی خوندي پاتې شوي ول.

bs/nz (AFP, AP, Reuters)