د افغانستان د بهرنيو چارو وزارت وياند، ګران هيواد، رسنيو ته په يوې استول شوې ويډيو کې په ترکيه کې د مهاجرو د ډوبې شوې کښتۍ په اړه وروستي معلومات ورکړي دي. هغه وايي: «تر اوسه د ۲۴ افغانانو جسدونه پيژندل شوي دي.»
د هيواد په خبره چې تر اوسه په مجموع کې ۵۸ مړي موندل شوي دي. هغه زياتوي: «په ترکيه کې د افغانستان سفارت او افغان حکومت په دې برخه کې کار کوي تر څو دغه اجساد کابل ته انتقال او کورنيو ته يې وسپاري.»
د افغانستان د کورنيو چارو وزارت همدا راز له افغانانو څخه غوښتي دي چې له غیرقانوني سفرونو څخه چې د دوی د ژوند په بيه تماميږي ډډه وکړي.
د مهاجرو لیږدونکې دغه کښتۍ د ترکيې په ختيځ کې ډوبه شوې وه چې تر ډوبیدو څو اونۍ وروسته، د قربانیانو نور جسدونه هم موندل شوي دي. په دوی کې دوه ماشومان هم شامل دي.
انځور: Imago Images/Xinhua/Ihlas Agency د ترکیې دولتي خبري آژانس «انادولو» تر دې وړاندې خبر ورکړی وو چې د جون میاشتې په وروستیو کې د مهاجرو د ډوبې شوې کښتۍ د قربانیانو تائید شوی شمیر ۵۴ ته لوړ شوی دی. د تيرې ورځي په رپوټونو کې ويل شوي ول چې د نورو قربانیانو د موندلو په موخه دې لټون ادامه ولري.
د ترکیې د کورنیو چارو وزیر سلیمان زویلو، د معلوماتو له مخې د جولای په اوایلو کې په دې کښتۍ کې ۶۰ تنه سپاره ول، خو دا چې کښتۍ څنګه ډوبه شوې ده، په دې اړه معلومات نه دي ورکړل شوي.
ډيری وخت انساني قاچاقبران په وړو او زړو کښتيو کې د هغو د وړتيا څخه ډير مهاجر سپروي چې ډيری وخت دغه خبره، په سمندر کې د مهاجرو د کښتيو د ډوبيدو سبب واقع کیږي.
آژانسونه/ م.ک.ص/ ن.ز.
زموږ له آرشیف څخه:
د یونان او ترکیې تر منځ مرګونی سیند
مهاجر یوازي له ترکيې څخه يونان ته د آژه سمندرګي له لاري د تګ هڅه نه کوي، بلکي د ایوروس یا ماریتسا سیند له لاري هم یونان ته ځانونه رسوي. خو په دغه هڅه کې تل انسانان خپل ژوند بايلي.
انځور: DW/M.Karakoulakiد ایوروس سیند پر څنډه په یوناني ژبه پر لوحه باندي لیکل شوي دي چې«احتیاط سرحد دی. د سیند په بله ژۍ ترکیه ده». د روان میلادي کال په اوږدو کې په زرونو مهاجرو هڅه کړې ده چې د خپل ژوند په بیه له دغه سینده په تیریدو سره اروپا ته ځانونه ورسوي.
یوازې په روان میلادي کال کې د یونان د ایفورس سیند په څنډه کې ۲۹ جسدونه موندل شوي دي. په وروستیو کې د یوه ۱۵ کلن ماشوم مړی موندل شوی وو. د موندل شوو مهاجرو جسدونه د یونان د الکساندرپولي ښار روغتون ته لیږدول کیږي. اوسمهال د روغتون په مرده خانه کې تر لسو زیات جسدونه پراته دي.
د روغتون په انګړ کې یخچالي کانتینر. دغه کانتنیر د سره صلیب نړیوالې کمېټې له لوري د روغتونو په اختیار کې ورکړل شوی دی. ځکه چې د السکاندرپولي روغتون د دې وړتیا نه درلوده چې د ډیرو مړو شوو مهاجرو جسدونه وساتي.
کله چې ښکاریان، کب نیونکي یا سرحدي چارواکي په سیند کې کوم مړی وویني، لومړی پولیس د تحقیقاتو په موخه دغه ځای ته رسیږي او انځورونه اخلي. تر هغې وروسته مړي د عدلي طب څیړنو له پاره وړل کیږي، چیرې چې پاولوس پاولیدیس، د مړي پر بدن نخښې نښانې لکه تاتو یا خالونه تشخیصوي او د جسد د ډې ان اې، نموني اخلي.
د پاولس د معلوماتو له مخې په دغه سیند کې زیاتره موندل شوي کسان ډوب شوي وي. خو ځيني بيا د یخنۍ له کبله مړه شوي وي. د هغه په خبره په وروستیو کې د سړک او اورګاډي د پيښو په ترڅ کې د انسانانو مړینه زیاته شوې ده.
هغه شخصي شیان چې له جسدونو سره موندل شوي په پلاستیکي کڅوړو کې ساتل کیږي، څو د تشخیص پر مهال ترې کار واخیستل شي.
دا دردونکې پروسه ده چې د مړو شوو مهاجرو پاته شوي شیان په نخښه شي او په کڅوړو کې واچول شي. زیاتره دغه شیان هغه څه وي چې په اوبو کې له منځه نه ځي.
هغه شیان چې له منځه نه ځي
زیاتره موندل شوي شخصي توکي چې د مهاجرو له جسدونو سره موندل کیږي د سرو یا سپینو زرو ګوتې او غاړگۍ وي. پاولس پاولیدیس وایي: «جامې او رسمي اسناد لکه پاسپورتونه زیاتره مهال په اوبو کې له منځه ځي.»
زیاتره مهال له مړو شوو مهاجرو سره داسي شیان موندل کیږي چې د هغوی له مذهب سره تړاو لري، لکه د بیلګې په توګه د څرمنې دغه ځانګړی کمربند. دا کمربند ښيي چې د دې کمربند تړونکی کس له افریقا سره تړاو لري. که چیرې یو کس وپيژندل شي د هغه پاته شوي شیان د هغه د کورنۍ غړو ته ورکول کیږي، البته د امکان په صورت کې.
که چیري د یوه مړه شوي مهاجر پيژندنه یا بیرته خپل اصلي ټاټوبي ته استول امکان و نه لري، نو بیا د یونان اړونده چارواکي هغوی خاورو ته سپاري. یا هغوی په زیدرو کې د مسلمانانو په هدیره کې او یا هم په اورستیادا کې د عیسویانو په هدیره کې ښخوي. ۲۱ کلن مطفی رهوان، چې د سوریې د حلب ښار اوسیدونکی وو دغلته ښخ دی.
