د ترکیې حکومت اعلان کړی څو د ترکیې د تابعیت د ترلاسه کولو له پاره پخواني شرایط نرم کړي. په دې ترتیب سره د چهارشنبې په ورځ (د ۲۰۱۸ کال د سپتمبر ۱۹مه نېټه) د ترکیې د تابعیت په قانون کې یو لړ مالي تغیرات په اړوند رسمي جريده کي رسماً خپاره شول. د نوي قانون په اساس، یو بهرنی وګړی چې د دریو کلونو له پاره په ترکیه کې د ۲۵۰ زرو ډالرو او یا د همدې مقدار لیرې په ارزښت جایداد ولري، د ترکیې د تابعیت ترلاسه کولی شي. تر دې وړاندې دغه مقدار یو میلیون ډالر ټاکل شوی وو.
په عین حال کې په ترکیه کې د پانګونې کچه هم د پخوا په پرتله را ټیټه کړل شوې ده. د ترکیې د تابعیت د ترلاسه کولو له پاره تر دې وړاندې یو بهرنی وګړی اړ وو چې په ترکیه کې د ۲ میلیونو ډالرو په ارزښت پانګونه وکړي، خو په نوي قانون کې دغه کچه ۵۰۰ زره ډالرو ته راټیټه کړل شوې.
انځور: Reuters
سربیره پر دې که چیرته یو بهرنی وګړی د ترکیې په بانکونو کې د دریو کلونو له پاره لږ تر لږه ۵۰۰ زره ډالر ولري، کولی شي چې د ترکیې تابعیت ترلاسه کړي. تر دې وړاندې دغه کچه ۳ میلیونه ډالر ټاکل شوې وه.
د ترکیې د تابعیت د نوي قانون په بله برخه کې راغلي چې که چیرته یو سوداګر په ترکیه کې د لږ تر لږ ۵۰ کسانو له پاره د کار زمینه برابره کړي، کولی شي چې د ترکیې تابعیت ترلاسه کړي. تر دې وړاندې دغه کچه ۱۰۰ کسان ټاکل شوې وه.
تیره اونۍ د ترکیې ولسمشر رجب طیب اردوغان د یوه نوي فرمان په صادرولو سره امر کړی څو په ترکیه کې د نقلیه وسایطو او جایدادونو پیر او پلور په ترکي لیره وشي. دا په داسې حال کې ده چې د روان کال له پیل نه تر اوسه پورې د ترکیې پولي واحد لیرې د ډالر پر وړاندې شاوخوا ۴۰ سلنه خپل ارزښت له لاسه ورکړی دی. د لیرې د ارزښت د لویدو ګڼ شمیر دلایل په ګوته کیږي خو تر ټولو مهم یې له واشنګټن سره سوداګریزه شخړه او همدا راز په ترکیه کې د اندریو برنسن په نامه یوه امریکايي کشیش توقیف یې له عمده دلایلو څخه شمیرل کیږي.
زموږ له آرشیف څخه:
کوم پاسپورت تر ټولو زیات سرحدونه درته پرانیزي؟
ډیر کم پاسپورتونه داسې دي چې سړی پرې هر چیري او هر کله چې وغواړي پرته له ویزې سفر کولای شي. دلته هغه پاسپورته کتلای شئ چې ډير سرحدونه ورته پرانيستي دي او هغه هم چې د زیاترو هیوادونو سرحدونه یې پرمخ تړلي دي.
انځور: picture-alliance/dpa/M. Becker
«جرمني ته ښه راغلاست»
آلمانیانو ته د نړۍ دروازې پرانستي دي. د لندن د مشورتي شرکت «هینلې او پارتنر» د معلوماتو په حواله آلمانان ۱۷۷ هیوادونو ته بې له ویزې سفر کولای شي. له دې سره آلمان په پرله پسې دریم کال لومړی ځای خپل کړی.
انځور: picture-alliance/dpa/R. B. Fishman
له خپل وطن سره مینه او نړۍ ته غیږ پرانستي
دوهم ځای سویډن لري. د ښایسته کلیو او ښکلي طبیعت خاوند دغه هیواد د نوري نړۍ د سیلانیانو له پاره یو په زړه پورې ځای دی. خو سویډنیان خپله هم ډیر د سفر شوقیان دي. د دوی د ټولو خارجي سفرونو ۷۱ سلنه د سیاحت په موخه ترسره کیږي. د نړۍ د ۱۷۶ هیوادونو دروازې دوی ته پرانيستي دي او پرته له ویزې ورته سفر کولای شي.
