تهران د ایران خلاف د آلمان، فرانسې او بريتانیا غوښتنه غندلی
۱۴۰۱ مهر ۳۰, شنبه
ایران د شنبې په ورځ له ملګرو ملتونو سازمان څخه د فرانسې، آلمان او بریتانيا هغې غوښتنې ته شدید غبرګون ښودلی چې وايي د روسيې له خوا په اوکراین کې د ایران ساخت ډرون الوتکو د استفادې تورونو په اړه دې تحقیقات ترسره شي.
د ایران د بهرنیو چارو وزارت ویاند، ناصر کنعانيانځور: Iranian Foreign Ministry/AP/picture alliance
اعلان
د ایران د بهرنیو چارو وزارت ویاند، ناصر کنعاني، د فرانسې، آلمان او بریتانیا هغه ادعاوې «ناسمې او بې بنسټه» بللي چې پکې پر ايران د نوو تحریمونو غوښتنه شوې ده.
د ایران د بهرنيو چارو وزارت پر ټويټر ليکلي دي چې د دغه وزارت ویاند د آلمان، فرانسې او بريتانيا په ګډه اعلامیه کې مطرح شوې دغه ادعا په شدت غندلې چې روسیه د اوکراین په جګړه کې د ايران ساخت ډرون الوتکو څخه استفاده کوي.
د ایران د بهرنيو چارو وزارت پر ټويټر ويلي دي چې د ملګرو ملتونو سازمان ټول غړي باید په بشپړه توګه د دغه سازمان په منشور کې ټول درج شوو ټولو اصولو او اهدافو، له هغې جملې د هیوادونو خپلواکۍ، حاکميت او ځمکنۍ بشپړتيا ته درناوی ولري. دغه وزارت په دې ارتباط ويلي دی: «موږ په اوکراین کې د سياسي مذاکراتو له لارې د سولې او د جګړې د فوري پای ملاتړ کوو.»
کیف ويلي دي چې روسيه د اوکراین په جګړه کې د ایران ساخت له شاهد-۱۳۶ ډوله جنګي ډرون الوتکو څخه استفاده کوي کوم چې د خپلو اهدافو پر لور حرکت کوي او په لګېدو سره ېې چاودنه کوي.
امریکا متحده ايالاتو هم ادعا کړې چې د ایران پوځي روزنکي د کریميا په نیمه ټاپو کې حضور لري او روسي ځواکونو سره د ډرون الوتکو په استفاده کې مرسته کوي. د امریکا د بهرنيو چارو وزارت وياند، نید پرايس چې په یوه خبري غونډه کې ېې خبرې کولې وويل: «موږ په دې هکله کره معلومات لرو»، خو په هکله ېې شواهد وړاندې نه کړل.
دا په داسې حال کې ده چې تهران تر دې مخکې هم مسکو ته د ډرون الوتکو اکمالات رد کړي او مسکو هم وايي چې ځواکونه ېې د اوکراین په جګړه کې د ایرانۍ جنګي ډرون نه کاروي.
آ./م.ک.ص./ا.ا.
له آرشیف څخه يو انځوریز البوم.
انځوریز رپوټ: د وسلو تر ټولو ستر تولیدونکي شرکتونه
