پاکستاني چارواکو ویلي چې پر یادې دروازې اوس مهال یوازې هغه افغان کډوالې کورنۍ اوښتلی شي چې د افغانستان او پاکستان د وروستیو نښتو پر مهال په پاکستان کې بندې پاتې وې.

د طالب او پاکستاني ځواکونو ترمنځ په کرښه له خونړیو نښتو وروسته د تورخم او چمن لار د ټولو پر مخ وتړل شوې چې له امله یې تیرې څو اونۍ سوداګر او عام وګړي بند پاتې وو.

سلګونه هغه افغان کډوالې کورنۍ چې په پاکستان کې له کورونو ویستل شوي او غوښتل یې افغانستان ته واوړي، د لارې بندېدو له امله د کرښې هغې غاړې د جمرود سیمې په یو لنډ مهالي پنډغالي کې ساتل کېدل چې د ځایي خلکو په خبره له ګڼو ستونزو سره مخ وو.

د تورخم دروازه چې لا هم د سوداګریزو موټرو پر مخ تړل شوې، د کرښې دواړه غاړې په سلګونو سوداګریز موټر بند پاتې دي چې سوداګر یې سخت زیانمن کړي دي.

تورخم د افغانستان او پاکستان ترمنځ یو له تر ټولو مهمو سرحدي لارو څخه ده. دا لار د دواړو هېوادونو ترمنځ د خلکو، توکو او سوداګرۍ اصلي تګ راتګ بندر بلل کېږي.

تورخم نه یوازې د سوداګریزو توکو د انتقال لپاره مهم دی، بلکې زرګونه افغان کډوال هم له همدې لارې پاکستان ته او یا بېرته افغانستان ته ستنېږي. دغه دروازه د تېرو څو کلونو په اوږدو کې څو ځله د سیاسي، امنیتي او نظامي ستونزو له امله تړل شوې او بیا پرانیستل شوې ده.