ننګرهار رسنیز دفتر تورخم کې د طالبانو ادارې د کمیسار مولوي عصمت الله یعقوب له قوله خبر ورکړی، چې پاکستاني لوري تورخم دروازه د سوداګریزو موټرو پر مخ په دې شرط تړلې چې د بار وړونکو موټرو چلوونکي باید پاسپورت او ویزه ولري. تر دې وړاندې پاکستاني لوري د بار وړونکو موټرو له چلوونکو د پاسپورت او ویزې غوښتنه نه کوله.

د تنظیرالله افغان په نوم یوه کس له تورخمه دویچه ویله سره اړیکه کې وویل، تورخم دروازه د بار وړونکیو موټرو پر مخ بنده شوې او اوس مهال دواړو لوریو ته ګڼ شمېر بار وړونکي موټر پر دروازې اوښتو ته په تمه ولاړ دي. هغه وویل، پر دروازه یوازې موټرې نه پرېښودل کېږي؛ خو مسافر پر دروازې دواړو لوریو ته د تګ اجازه لري.

د سوداګریزو موټرو پر مخ د تورخم دروازې تړلو له امله تېر کې سوداګرو ته مالي زیانونه اوښتي.

تورخم دروازه د روان کال سپټمبر میاشت کې هم د مسافرو او ټرانزیت پر مخ تړل شوې وه، چې له خلاصېدو سره یې پاکستانله هغه هېواده د افغانانو د ویستلو پرېکړه وکړه او تر دې دمه سلګونه زره افغانان په زور او خپله خوښه هېواد ته راستانه شوي دي.