له کلونو راهیسې پر دغه دروازې د سوداګریزو لاریو چلوونکي له پاسپورت او ویزې پرته تېرېدل، خو په وروستیو کې پاکستان لهافغانستانه د ورتلونکو سوداګریزو موټرو له چلوونکو څخه پاسپورت او ویزه غوښتل، چې له امله یې څو ځل دا لار تړل شوې ده.

اسوشیتید پریس خبري اژانس د افغانستان او پاکستان د سوداګرۍ او صنایعو ګډني خونې د مشر ضیاالحق سرحدي له قوله لیکلي دي چې د دواړو هېوادونو چارواکو تر څو مسلسلو غونډو وروسته د دروازې پر پرانيستلو هوکړه وکړه، خو پاکستاني لوري موټر چلوونکیو ته د ویزې د اخستلو له پاره د مارچ میاشتې ۳۱ نېټې پورې وخت ورکړی دی.

د ننګرهار امنیې قومندانۍ له پاره د طالبانو ویاند عبدالبصیر زابلي هم د تورخم دروازې د بیرته پرانيستلو خبر ورکړی دی، خو په دې اړه یې ډېر جزئیات نه دي ورکړي.

د طالبانو تر ادارې لاندې باختر خبري اژانس هم په تورخم کې د طالبانو د کمیسار مولوي عبدالجبار حکمت له قوله خبر ورکړی دی، چې تورخم دروازه د هر ډول تګ راتګ پر مخ پرانستل شوې ده.

له تورخم څخه یو ملکي وګړي تنظیرالله افغان دویچه ویله ته وویل، تورخم دروازه د سې‌شنبې په سهار د سوداګریزو موټرو پر مخ پرانيستل شوې ده او اوس له دواړو لوریو لویې لارۍ پر دغې لار دواړو خواو ته اوړي. د دغې لارې د تړلو له امله د دواړو لوریو سوداګرو ته ډېر مالي زیانونه هم اوښتي دي.

په وروستیو میاشتو کې دغه دروازه د مختلفو دلايلو له امله د امنيتي ځواکونو تر منځ نښتو له کبله څو واري تړل شوې ده.

زموږ له آرشيف څخه: