فرانسه لومړنی اروپایي هیواد وو چې په عامه ځایونو کې یې پر نقاب او چادري باندې بندیز ولګاوه. دغه بندیز د ۲۰۱۱م کال له اپریل میاشتې راهیسې نافذ دی. «هیڅوک په عامه ځایونو کې د داسي کالیو اغوستلو اجازه نه لري، چې مخ په بشپړه توګه پټ کړي.» پر دې سربیره په ښوونځیو کې پر هر ډول مذهبي کالیو اغوستو باندي بندیز دی، د پوړني اجازه هم نه شته.

بلجیم د ۲۰۱۱م کال له جولای میاشتې څخه په عامه ځایونو کې پر مخ پټولو بندیز وضع کړ. که څوک له دې قانون څخه سر وغړوي، باید نغدي جریمه ورکړي او یا آن تر اوو ورځو پورې په بند کې تيري کړي.

د هالنډ پارلمان په بشپړ ډول پر مخ پټولو باندي بندیز په ۲۰۱۶م کال کې وضع کړ. خو پر بشپړ حجاب یا نقاب باندي بندیز په ټول هیواد کې نه شته، بلکې یوازې په دولتي ودانیو کې، په عامه ترانسپورت کې او په ښوونځیو او روغتونو کې پرې بندیز دی. له دغه بندیز څخه سرغړونکې تر ۴۰۰ یورو پوري نغدي جريمه کيدای شي.

د هالنډ په شان، بلغاریا هم په ۲۰۱۶م کال کې پر بشپړ مخ پوټي بندیز لګولی دی. په دغه هیواد کې هم د غه قانون ته د نه پاملرني په ترڅ کې نغدي جریمه آن تر۷۵۰ یورو پوري رسیږي. خو دلته هم په ټولو ځایونو کې بندیز نه دی. د سپورټ، دندې او عبادت ځایونو په برخه کې استثنا شته.

اتریش د ۲۰۱۷م کال په اکتوبر میاشت کې پر بشپړه مخ پوټي باندي بندیز ولګاوه چې د «مخ پوټي ضد قانون» په نامه یادیږي. د دغه قانون له مخې په عامه ځایونو کې له زنې څخه تر ویښتانو پوري باید مخ ښکاره وي. که څوک دغه کار و نه کړي، تر ۱۵۰ یورو پورې ښایي جریمه شي.

د اگست مياشتي له لومړۍ نېټې څخه په ډنمارک کي پر نقاب باندي بندز دی. د دغه هيواد پارلمان د ۲۰۱۸م کال د می ۳۱ د پر بشپړ مخ پټولو بندیز ولګاوه. ۷۵ استازو د دغه قانون په پلویتوب او ۳۰ په مخالفت کې خپلې رای وکارولي. له قانون څخه د سرغړوني په صورت کې تر ۱۳۵ یورو نغدي جریمه ټاکل شوې ده، او د تکرار په صورت کې ښایي دغه جریمه لس واري زیاته شي.