د آلمان د بهرنيو چارو وزارت د ايټالیا هغو سيمو ته د سفر په اړه خبرداری جاري کړی دی چې تر سختو اورښتونو وروسته د سېلابونو او ځمکې ښوېدنې له کبله اغیزمنې شوي دي. په دې منځ کې د تلفاتو شمیر هم لوړ شوی دی. تر اوسه د لسو کسانو د مړينې خبر ورکړل شوی دی.

د ايټالیا په ځينو برخو کې د سېلابونو او ځمکې ښوېدو خطر دی. د آلمان د بهرنيو چارو وزارت خبرداری ورکړی دی چې د ايټالیې د مرکزي او جنوبي سيمو په ګډون په ټولو ساحلونو کې طوفانونه راتللی شي. وزارت په ځانګړي توګه هغو مسافرينو ته د احتياط سپارښتنه کړې چې په ایميليا – روماګنا او سيسل سيمو کې دي.

د ځمکې ښوېدنې د کابو ۱۰۰ پېښو رپوت ورکړل شوی دی. د ايميليا - رومانګا په اغیزمنه سيمه کې ۱۰ زره اوسيدونکي مجبور شوي خپل کورونه پريږدي.

تر سختو اورښتونو وروسته د ايټاليا د اميليا – رومانګا او مارکه سیمو کې سخت سېلابونه راغلي. ۲۱ سيندونه دومره ډک شول چې اوبه یې له څنډو واوښتې او ۳۶ ښارونه او ښارګوټي سېلاب لاندې کړل.

د سيمې اوسيدونکو ته خبرداری ورکړل شوی دی چې د خپلو کورونو او اپارتمانونو تکاويو او د ځمکې منزلونو ته دې په هیڅ صورت کې نه ورځي. ډیرو اوسيدونکو د کورونو پاسنيو پوړونو او بامونو ته په تللو سره خپل ژوند ژغورلی دی.

د ايټاليا پوځ او ساحلي پوليس هم د ژغورنې په عملياتو کې برخه اخلي. د سيمې اوسيدونکي او له ځينو کورونو څخه د هغوی کورني ژوي په ځينو قضيو کې د څرخي الوتکو له لارې وژغورل شول.

ژغورونکي او د سيمې اوسيدونکي ورځ او شپه بوخت دي څو خلک خوندي ساحو ته انتقال کړي. ماشومان او زاړه کسان د ژغورونکو له خوا پر اوږو او يا په بادي کښتيو کې خوندي ساحو ته انتقال شول.

خلک اوس هم لادرکه دي. د ايټالیا د اطفایې خدماتو اعلان کړی دی چې د راوينا، فورلي، چزنا، راميني او بلونګا ایالتونه او په ځانګړي توګه د فاينستا، چزنا او فورلي ښارونه ډېر اغیزمن شوي دي. د ملکي دفاع ادارې له خلکو غوښتي چې په راتلونکو ورځو کې دې هم له ډېر احتياط څخه کار واخلي.