په سپينه ماڼۍ او د ترمپ په کابينه کې د اشخاصو بدلیدل کومه نوې خبره نه ده، خو هغه څه چې نوي دي هغه د ترمپ د دولتي مسئولينو پرله پسې بدلیدل دي. اوس ترمپ یو وار بیا د خپل دفتر د مشر د تغیرولو خبره کړې ده.

ترمپ د شنبې په ورځ اعلان وکړ چې جان کلي یوازې د روان ميلادي کال تر پایه پورې د جمهوري ریاست د دفتر د مشر په توګه فعالیت کوي. ترمپ زیاته کړې ده چې تر دوشنبې ورځې (د دسمبر میاشتې ۱۰) پورې به د جان کلي ځای ناستی معرفي کړي. امریکایې رسنیو لیکلي دي چې ترمپ لیوالتیا لري چې نیک ایرز د جان کلي پر ځای د جمهوري ریاست د دفتر مشر وټاکي.

نیک ایرز څوک دی؟

په هغه صورت کې چې ترمپ نیک ایرز د خپل دفتر د مشر په توګه وټاکي، هغه به تر ټولو ځوان کس وي چې له ۱۹۸۰ کال راهيسې د امریکا متحده ایالاتو د جمهوري ریاست د دفتر مسئولیت او سرپرستي په غاړه واخلي.

نیک ایرز ۳۶ کاله عمر لري او همدا اوس د ولسمشر د مرستیال مایک پنس د دفتر مشر دی. سپينې ماڼۍ ته نږدې ديپلوماتيکو کړیو رسنیو ته ویلي دي چې د میاشتو راهیسې د ترمپ د دفتر د چارو د پر مخ بیولو له پاره له نیک ایرز سره خبرې اترې روانې وې.

د ترمپ او جان کلي تر منځ د نظر اختلافاتو د جمهوري ریاست د دفتر له سرپرستۍ څخه د هغه د لیري کولو اوازو ته لمن وهلې وه. اوس د «نیویارک ټایمز» ورځپاڼې د نیک ایرز له خوا د دې مقام د منلو خبر ورکړی دی.

ویل شوي چې نیک ایرز منلې ده چې د یوې ټاکلي مودې له پاره د امریکا د ولسمشر د دفتر د مشرۍ چارې پر مخ بوځي، په داسې حال کې چې ترمپ غواړي هغه د یوې اوږدې مودې له پاره دغه دنده ترسره کړي.

په دوو کلونو کې د دفتر دری رئیسان

د نومبر میاشتې په اوسطو کې ترمپ د جان کلي له فعالیتونو څخه نارضایتي ښودلې وه. ترمپ ویلي وو چې په ځينو مواردو کې د خپل دفتر له مشر سره د نظر اختلاف لري. جان کلي د ۲۰۱۷ م کال په دوبي کې د ولسمشر د دفتر د رئيس په توګه خپله دنده پيل کړې وه.

په آلمان کې د «شپيګل آنلاین» خبري انټرنټ پاڼې د دې خبر د خپرولو ترڅنګ په سپينه ماڼۍ کې او د ترمپ په کابينه کې یو شمیر نورو تغیيرانو ته هم اشاره کړې ده.

ترمپ د جمعې په ورځ «د دسمبر میاشتې ۷» د عدلیې وزیر او همدارنګه د ملګرو ملتونو په سازمان کې د خپل سفیر د بدلونو خبر ورکړی دی. په دې توګه نو ویلیم بار د عدلیې د وزیر جف سېشنز ځای ناستی او هدر نائورت د ملګرو ملتونو په سازمان کې د امریکا د نوې سفيرې په توګه ټاکل شوي دي. مخکې تر دې نیکي هیلې د ملګرو ملتونو په سازمان کې د امریکا د سفيرې په توګه دنده ترسره کوله.

سربیره پر دې ولسمشر ترمپ ۶۰ کلن جنرال مارک میلي چې په افغانستان او عراق کې یې پوځي خدمت ترسره کړی د جنرال ډانفورډ ځای ناستی او د لوی درستیزانو د مشترکې کمیټې مشر ټاکلی دی. میلي د تیرو دریو کلونو راهیسې د امریکا د اردو د قوماندان په صفت دنده ترسره کوله. په یاده کمیټه کې د متحده ایالاتو، د سمندري، هوایي او ځمکنيو ځواکونو لوی درستیزان شامل دي.