جاپان د جایکا موسسې له لارې له ۲۰۱۱م کال راهیسې «د اغیزمن پرمختګ په موخه د افغانانو ظرفیت لوړونې» پروژه پيل کړې ده، چې نن چهارشنبې (۲۰۱۶ م کال د اګست ۲۴مه) ددې پروژې د افغان محصلینو وروستۍ ډله هم جاپان ته روانه شوه.
په دې ډله کې ۶۴ افغان ځوانان شامل دي چې په هغه هېواد کې به د ماسټرۍ او دکتورا تر کچې زده کړي وکړي.
په کابل کې د جاپان سفیر هیروشی تاکاشي، په دې اړوند جوړي شوي خبري غونډي ته وویل افغانانو ته په تحصیلي بورسونو ورکولو سره غواړي نړېوالو ته د افغان ځوانانو وړتیا وښيي: «تاسو اوس یوې داسي جبهي ته ننوزی چې نړۍ ته د افغانانو عقل وروښیی، زما هیله داده چې تاسو خپل هيواد او خلکو ته خدمت وکړی نه خپل جیب ته.»
تردې وړاندې د جاپان د نړېوالو همکاریو ادارې (جایکا) د اغیزمن پرمختګ په موخه د افغانانو ظرفیت لوړونې پروژې له لارې ۴۴۳ افغان ځوانان جاپان ته د لوړو زده کړو له پاره لېږلي، چې ددغو ۶۴ محصلینو په ورتګ سره به یې شمېر ۵۰۷ تنو ته ورسیږي.
د افغانستان د لوړو زده کړو وزارت مرستيال محمدعثمان بابري، له جاپان څخه مننه وکړه او ترڅنګ یې ډاډ ورکړ چې د اغیزمن پرمختګ په موخه د افغانانو ظرفیت لوړوني پروژې پر سر له جایکا سره خبري روانې دي.
ده وویل هیله من دی چې یاده پروژه به تر یو لړ کتنو وروسته بیاځلې تمدید شي، چې پرمټ یې لانور افغان ځوانان هم په جاپان کې لوړو زده کړو ته لاره ومومي.
د بابري په وینا د یادې پروژې په تمدید سره به ۲۵۰ نور افغان محصلین هم د لوړو زده کړو په موخه جاپان ته واستول شي.
په افغانستان کې لوړو زده کړو ته د لاسرسي ډېرېدل
هاخوا د لوړو زده کړو وزارت مرستیال محمد عثمان بابري، د افغانستان د لوړو زده کړو په بهیر کې یوه بل ستر پرمختګ ته هم اشاره وکړه.
د نوموړي په وینا اوسمهال په دغه هېواد کې لوړو زده کړو ته د لاسرسي کچه لوړه شوې ده.
اوسمهال د افغانستان په ۳۶ دولتي او ۱۲۷ خصوصي پوهنتونونو کې ۳۶۰۰۰۰ محصلین په زده کړو بوخت دي.
د لوړو زده کړو وزارت چارواکې وایې، چې د هېواد په ډيری سویلي ولایتونو کې لاهم د ناامنیو او بېلابېلو لاملونو پربنسټ، هر کال ۱۵ سلنه ځوانان له لوړو زده کړو پاتيږي.
د محصلینو له پاره د نړۍ تر ټولو ښه ښارونه
د پوهنتون نړیوال اعتبار، د محصلینو له پاره امکانات، ارزاني او نور داسې عوامل د دې سبب کیږي چې ځینې ښارونو د محصلینو له پاره په زړه پورې وي.
انځور: Fotolila/Andres Rodriguezد QS بریتانیایي شرکت په ۲۰۱۶م کال کې د محصلینو له پاره د تر ټولو په زړه پورې ښارونو نوملړ وړاندي کړی دی.
په دغه نظر سنجي کې پاریس د محصلینو له پاره تر ټولو په زړه پوړې ښار نومول شوی دی. دغه ښار ډیره ګڼه ګوڼه لري او د محصلینو له پاره ډیر فرهنګي او هنري امکانات لري.
د استرالیا ملبورن ښار د ۳۹۸ نومرو په ترلاسه کولو سره دویم ځای خپل کړی دی. ملبورن اووه پوهنتونونه لري او د استرالیا فرهنګي مرکز بلل کیږي.
د جاپان پلازمینې توکیو د ۳۹۱ نومرو په اخیستلو سره دریم ځای خپل کړی دی.
د سیدني ښار چې پنځه پوهنتونونه لري او ۳۸۸ نمرې اخیستې دي، څلورم مقام خپل کړی دی. په دې ښار کې د محصلینو له پاره د کار امکانات ډیر دي او له همدې کبله ډیر محصلین غواړي چې دلته زده کړې وکړي.
لندن د ۳۸۳ نمرو په ترلاسه کولو سره پنځم ځای خپل کړی دی.
سنګاپور ۳۸۰ نمرې اخیستې دي او شپږم یې خپل کړی دی.
مونترال ۳۷۷ نمرې لري او په اووم ځای کې دی. د دې ښار پوهنتونونه په کانادا کې تر ټولو لوړ ځای او په نړۍ کې ۲۴ ځای لري.
هانګانګ ۳۷۳ شمیرې لري او اتم ځای یې خپل کړی دی. په دې ښار کې د لوړو رتبو لرونکو پوهنتونونو شتون د دې سبب شوی دی چې ډیر محصلین هم له هانګانګ سره لیوالتیا پیدا کړي.
برلین ۳۶۹ نمري اخیستې دي او نهم ځای یې خپل کړی دی. برلین درې لویې پوهنتونونه لري او په دې ښار کې د ژوند شرایطو ښه کیدل د دې سبب شوي دي چې ډیر شمیر محصلین له برلین سره لیوالتیا پیدا کړي.
د جنوبي کوریا پلازمینه سول ۳۶۷ نمري ترلاسه کړي دي او په نړۍ کې د محصلینو له پاره ۱۰ تر ټولو غوره ښار دی.
د آلمان مونشن ښار ۳۶۶ نمرې ګټلي دي او په یوولسم ځای کې راغلی دی.
زوریخ ۳۶۵ نمري او دولسم ځای لري.
د کانادا تورنتو او ونکوور او د امریکا متحده ایالاتو بوستون ښار ۳۵۵ نمرې ترلاسه کړي دي او دیارلسم ځای یې خپل کړی دی.
وین ۳۵۴ نمرې لري او په شپاړلسم ځای کې دي. په دې ښار کې په پوهنتونونو کې ثبتیدل ډیر آرزانه دي او د بهرنیو زده کوونکو له پاره د ژوند مصرف هم ټیټ دی.
