له جاپان څخه تېره ورځ په سر کې د دوشنبې ورځې (د ۲۰۲۴م کال د جنورۍ ۱مه) د زلزلې له کبله د مړو شمېر ۳۰ او لږ وروسته ۴۸ وښودل شول خو نن چهارشنبه جاپاني رسنیو وويل چې په زلزله کې د مړو شمېر ۶۲ ته رسېدلی دی.
د جاپان ان اچ کې تلويزیون رپوټ ورکړی چې دغه کسان په زلزله کې سخت زیانمن شوي ښار، ايشيکاوا، کې مړه شوي دي. همدارنګه د نوتو نیمه ټاپو په واجیما، سوزو او نوټو ښارګوټو کې ګڼ شمېر کورنه نړېدلي او يا تر زلزلې وروسته رامنځ ته شوې اورلګېدنه کې په بشپړه توګه لمنځه تللي دي.
پر لارو او سړکونو پرتې ويجاړۍ، خټې او کثافات لا هم د ژغورونکو ډلو له پار د لټون عملیات له خنډ سره مخ کوي.
د جاپان صدراعظم، فومیو کشيدا، د چهارشنبې په ورځ وويل چې دغه وضعیت ممکن زلزله ځپلو سيمو ته په چټکۍ د مرستو په رسولو کې خنډ وګرځي. زیاتره زلزله ځپلې سېمې د جاپان په ختیځ کې واقع دي.
د جاپان صدراعظم، فومیو کشيدا اعلان وکړ چې هغو سیمو ته چې د ورتلو لارې ېې بندې شوي اولیه کومکي مواد ورته د پوځ په چورلکو کې رسول کيږي. صدراعظم همدا راز زیاته کړه چې زلزله ځپلو سیمو ته د مرستو رسولو په موخه په لومړي سر کې ۱۰۰۰ سرتيري په دندو ګمارل شوي ول، چې اوس دغه شمېر دوه برابره شوی دی.
د جاپان د هوا پېژندې ادارې تر پنجشنبې ورځ پورې د وقفوي بارانونو وړاندوینه کړې چې ورسره ېې د لا ډېرو احتمالي ځمکې ښوېدنو خبرداری هم ورکړی دی.
سږکال د جاپانیانو له پاره نوی عیسوی کال له زلزلو سره پيل شو. د ۲۰۲۴م کال له پېله جاپان د پر له پسې زلزلو شاهد دی. په دې کې تر ټولو ځواکمنه او زیان اړونکې زلزله د دوشنبې په ورځ وشوه چې د رېشتر په کچه ۷ اعشاريه شپږ درجې وه.
(dpa)mks/akh
له آرشیف څخه (د جنوري دوهمه ۲۰۲۴):
چارواکي: د جاپان په زلزله کې د مړو شمېر ۴۸ ته لوړ شوی
په جاپان کې د تېرې ورځې په ويجاړونکې زلزله کې د مړه شوو کسانو شمېر ۴۸ ته لوړ شوی دی. د ټپيانو شمېر هم ډېر دی. د زلزلې له کبله شاوخوا ۴۵زره کورونو باندې برېښنا قطع شوې. چارواکو د نورو زلزلو خبرداری ورکړی دی. انځور: Kyodo News via AP/picture alliance د ۲۰۲۴م کال په لومړۍ ورځ د ریشتر په کچه ۷ اعشاریه ۶ درجې زلزلې د جاپان یو شمېر برخې ولړزولې. دغې زلزلې درنه مرګ ژوبله اړولې ده. د سه شنبې ورځ تازه رپوټونه وايي د مړو ۴۸ ته رسيدلی دی. چارواکي وايي زلزلې تر ټولو ډېر زیان په ایشکاوا ایالت کې اړولی دی.
انځور: Kyodo News/AP/picture alliance تر زلزلې وروسته اور لګيدنې د مړه شوو کسانو نیمايي ېې د ایشيکاوا ولایت د نوتو جزېرې په واجیما بندري ښار کې ثبت شوي دي. په دغه سيمه کې کورونه تخریب شوي او تر زلزلې وروسته اورلګېدنه رامنځ ته شوې چې په انځور کې ېې لوګی تر سترګو کېږي.
انځور: Kyodo News/AP//picture alliance د اوبو او برېښنا قطع کېدل په دغه انځور کې په زلزله کې تخريب شوي کورونه ليدل کيږي. د زلزلې له کبله پر شاوخوا ۴۵ زره کورونو برېښنا قطع شوې ده. پر اکثرو سيمو د څښاک اوبه هم قطع شوې دي.
انځور: Yomiuri Shimbun via AP/picture alliance د دوشنبې ورځې زلزله د جاپان په اوزاکا او کیوتو ښارونو کې احساس شوه. رپوټونه وايي چې په جاپان کې تر دغې زلزلې څو دقیقې مخکې یوه بله ۵ ریشتري زلزله هم شوې وه. د تازه رپوټونو مطابق، چارواکو د نورو زلزلو خبرداری ورکړی دی.
انځور: The Yomiuri Shimbun/AP/picture alliance لوړو پرتو سيمو د تللو سپارښتنه تر زلزلې وروسته د جاپان عمومي تلویزیوني شبکې «ان اچ کې» اعلان وکړ چې «ټول ځایي اوسيدونکي باید په سملاسي توګه لوړو ځایونو ته ولاړ شي.»
انځور: The Yomiuri Shimbun/AP/picture alliance د جاپان د هوا پيژندنې ادارې، تر شديدې زلزلې وروسته، په سواحلو کې د دريو مترو لوړو څپو د يوه احتمالي سونامي خبرداری ورکړ .
انځور: Tosei Kisanuki/The Yomiuri Shimbu/AP/picture alliance په دې انځور کې ليدل کیږي چې سړکونو درزونه کړي دي. په ټولنیزو رسنيو کې د زلزلې د رامنځته کیدو د شيبې عکسونه او ويډيوګانې نشر شوی دي. په ځينو عکسونو کې ليدل کیږي چې ډېری سړکونه تخريب شوي او لوې درزونه پکې رامنځته شوي دي.
انځور: Kyodo News/AP/picture alliance په جاپان کې تر زلزلې وروسته د دغه هېواد اټومي بټیو په هکله د احتمالي زیانونو اندېښنې وښودل شوې. خو د جاپان حکومت ويلي دی چې ټولې اټومې بټۍ او سیمې ېې خوندي دي او کومه بې نظمي نه ده رامنځ ته شوې.
انځور: Norikazu Tateishi/The Yomiuri Shimbun/AP/picture alliance جاپان په اصطلاح د آرام سمندر د اور پر کړۍ واقع دی چېرته چې تکتونیکي تختې له يو بل سره يوځای کيږي. زلزلې او آتشفشانونه تر ډېره په همدا ډول سیمو کې کیږي.
انځور: Yomiuri Shimbun via AP/picture alliance
