البرت آينشتاين په ۱۹۳۹م کال کي د امريکا ولسمشر فرانکلين روزوېلت ته د اتومي تجزيې د قوت په تړاو يو ليک ولېږی. ترمخه جرمني ساينسپوه اوتو هان د نويترونو په شعاع د يورانيمو اتومي تجزيه تجربه او کشف کړې وه. اينشتاين په ليک کي ليکلي ول چي که په دې وسيله بم جوړ سي نو به زيات قوي وي. روزوېلت سمدلاسه د يورانيمو په تړاو مشاورتي جرګه جوړه کړه.

د ۱۹۴۱م کال د دسمبر مياشتي پر ۷مه نېټه په سونو جاپاني جنګي الوتکو د متحده ايالاتو په هوايي کي د پېرل هاربور نظامي بندر تر زياتي اندازې له منځه يووړ. په دغه بريد کي په زرونو عسکر ووژل سول. يوه ورځ وروسته متحده ايالاتو جګړې ته د داخليدو اعلان وکړ.

د ۱۹۴۲م کال په اګست مياشت کي امريکا متحده ايالاتو پرېکړه وکړه چي په استخباراتي توګه به د اتومي بم پر پروګرام کار پېلوي. دغه مخفي پروګرام ته وروسته د مانهېتن نوم ورکړل سو. ولسمشر روزوېلت د دغه مقصد له پاره ۲ ميليارده ډالره بوديجه ځانګړې کړه.

د اتومي بم جوړونې تجربې د نوي مکسيکو په لوس آلاموس کي په يوه مخفي تجربه ګاه کي پېل سوې. روبېرت اوپنهايمر د دغه پروژې ساينسي رئيس مقرر سو. په دغه پروژه کي د متحده ايالاتو، کاناډا او بريتانيا عالي فيزيکپوهان وګومارل سول. په دغه پروژه کي له جرمني نازيانو څخه تښتېدلو په زرهاؤ کسانو هم ګډون وکړ.

د ۱۹۴۵م کال د مارچ مياشتي پر ۹مه او ۱۰ نېټه د توکيو په گډون د جاپان يو شمېر ښارونه بمبار سول. په دغو بمباريو کي صرف په پلازمېنه توکيو کي نژدې ۱۰۰ زره انسانان ووژل سول.

د اوکي ناوا جګړه د ۱۹۴۵م کال د مارچ مياشتي پر۲۶مه نېټه پېل سوه. په دغه جګړه کي نژدې ۱۰۰ زره جاپاني عسکر او په همدغه شمير يې ولسي وګړي قرباني سول. نژدې ۱۲۰۰۰ امريکايي عسکر هم ووژل سول. امريکايي چارواکو د دغو قربانيانو د شمېر پر اساس د اتومي بم استعمال توجيه کړ. استدلال يې دا وو چي بې له اتوم څخه به لا زيات جاپانيان وژل سوي وای.

روزوېلت د اپريل پر ۱۲ مړ او هېري ترومن د امريکا متحده ايالاتو نوی ولسمشر سو. تر ولسمشر کېدو وروسته هېري ترومين د اتوم بم په مخفي پروژه «مانهېتن» خبر سو، چي په لوړه اندازه مخفي ساتل سوې پروژه وه. د نوموړي دغه انځور په ۱۹۴۵م کال اخيستل سوی دی.

د ۱۹۴۵م کال د می مياشتي پر ۸مه نېټه نازي آلمان تسليم سو او په دې توګه په اروپا کي دويمه نړيواله جګړه پای ته ورسېده. خو د هغه باوجوده په اسيا او اوقيانوس کي جګړې ادامه لرله. په می او جون مياشتو کي د اتومي بم برخې د ماريانا جزيرو له لړۍ څخه و تينيان ته انتقال کړل سوې. له دغه ځای څخه و جاپان ته د B-29 ډوله الوتکي رسيدګي ممکنه وه.

د ۱۹۴۵م کال د جولای مياشتي پر ۱۶مه نېټه د نوي مکسيکو په الاموګوردو کي د ترينيتي په نوم اتومي بم ازموينه تر سره سوه. په دغي ازموينه سره د اتومي بم قوت تثبيت سو او په دې توګه د اتومي بمونو پېر پېل سو.

ولسمشر ترومن د جولای مياشي پر ۲۵مه نېټه فرمان لاسليک کړ چي له مخه يې پر جاپان د اتومي بم د غورځولو اجازه ورکړل سوه. په دغه فرمان يا امر کي دا اجازه هم ورکړل سوې وه چي کله چي نوي بمونه د لاسرسي وړ وي نو د هغوی د استعمال اجازه هم سته.

امريکا متحده ايالاتو، بريتانيا او چين د جولای مياشتي پر ۲۶ د پوستدام تر اعلاميې وروسته جاپان ته خبرداری ورکړ چي يا خو دي تسليم سي او يا به «په بشپړه توګه تباه کړل سي.» جاپان دغه خبرداری له پامه وغورځاوه او په جواب کي يې په جاپاني ژبه وليکل چي «موکوساتسو» يعني «پرته له تبصرې».

د امريکا متحده ايالاتو نظامي الوتکي ‌B-29 د ۱۹۴۵م کال د اګست مياشتي پر ۶مه نېټه په خايي وخت سهار پاو بالا اته بجو د جاپان پر هيروشيما د «اينولا ګې» په نوم ۴۰۸۲ کلوګرامه اتومي بم وغورځوی. د دغه بم په نتيجه کي ۱۴۰ زره انسانان ووژل سول. ترومن جاپاني چارواکو ته وويل چي که تسليم نه سي نو له آسمان څخه به د دا ډول بمونه داسي باران پر وکړي چي تر مخه چا نه وي ليدلي.

امريکا متحده ايالاتو د اګست مياشتي پر ۹مه نېټه د جاپان پر ناګاساکي بل اتومي بم استعمال کړ. دغه بم د ورځي په لږ باندي ۱۱ بجو وغورځول سو او پکښي شاوخوا ۷۴۰۰۰ انسانان ووژل سول.

د جاپان پاچا هيروهيتو د اګست مياشتي پر ۱۵مه نېټه اعلان وکړ چي هيواد يې جګړه وبايلله. نوموړی تر هغه وروسته هم د هيواد پاچا پاته سو او د هيواد په بيا رغونه کي يې لوی لاس درلود.

شوروي اتحاد پر هيروشيما د امريکايي اتومي بم د غورځول کيدو څخه څلور کاله وروسته د ۱۹۴۹م کال د اګست مياشتي پر ۲۹مه نېټه په قزاقستان کي بريالۍ اتومي تجربه تر سره کړه او په دې توګه د نړۍ دويم اتومي بم لرونکی قدرت وګرځيد. شوروي د دويمي نړيواله جګړې په وروستيو ورځو کي پر جاپان بريد وکړ او د کوريل ټاپو په شمول يې يوه اندازه سيمي ورڅخه ونيولې.