اوس هم، هره مياشت اروپا ته زيات شمير ځوانې مهاجرې ښځې رسيږي چې د هرې يوې په سترګو کې ښې راتلونکې خوبونه وې، خو برخلاف له دغو ښځو او نجونو څخه زيات شمیر يې تر کلونو کلونو د جنسي غلامۍ په لومو کې نښتې پاتې کيږي.
د ايټاليا په سويلي ساحلونو کې د انساني قاچبرانو له شر څخه د ځوانو ښځو ژغورنه کوم اسانه کار ندی. له نايجريا او نورو افريقايي هيوادونو څخه هغه ځوانې ښځې او پيغلې چې د ېوې ښې راتلونکې په فکر اروپا ته مهاجرت کوي، ډیری يې د تمې خلاف د جنسي مقاصدو ښکار ګرځي. دغه مسئله اوس په سيمه کې په يوې سترې ستونزې اوښتې ده.
د ځوانو ښځو ژغورنه
کوم مهاجر چې د مديترانې سمندرګې له لارې د ايټاليا ټاپوګانو ته ځانونه رسوي، د سياسي پناه غوښتنې چارې یې ترلاس لاندې نيول کيږې او ماشومانو ته يې د لوبو سامان ورکول کيږي. په دې لړ کې د مهاجرو په چارو کې د ملګرو ملتونو اداره بيا تر ټولو زيات پام د ځوانو ښځو ژغورنې ته اړوي.
ويل کيږي چې له ۱۹۸۰ کال څخه راپديخوا له نايجريا څخه زيات شمير ځوانۍ ښځې ايټاليا ته راوړل کيږي. دغو ښځو سره په سر کې د ښو دندو او ښې راتلونکې ژمنې ترسره کيږي، خو وروسته انساني قاچاقبران هغوي جنسي کاروبارونو ته سوقوي.
لوړه تقاضا او«جبري جنسي کاروبار»
په دغه ځای کې د جنسی کاروبار لپاره د ځوانو ښځو تقاضا په پر له پسې توګه د زياتيدو په حال کې ده له همدې امله، په ورستيو څو کلونو کې د دغه کاروبار بازار په انتهايي توګه تود شوی دی.
د مهاجرو په چارو کې د ملګرو ملتونو نړېوالې ادارې (IOM) پر وينا، په ۲۰۱۳ کال کې ۴۳۳ تنه نايجريايي پيغلې ايټاليا ته رسيدلې وې، چې په ۲۰۱۴ کال کې دغه شمیره ۱۴۵۴ ته پورته شوه. په همدې ډول تير کال ايټاليا ته د رسيدلو نايجريايي نجونو شمير څه باندې ۵۵۰۰ وه او د روان کال په لمړيو نهو مياشتو کې يې خبره آن تر نژدې ۸۰۰۰ پورې رسيدلې ده.
د ملګرو ملتونو د مهاجرت ادارې کارکونکی لوکاپیانيسي واي:« له دغه شمير مهاجرو ښځو څخه، ۷۰ تر ۸۰ سلنه يې په جبري توګه جنسي کاروبار ته اړ ایستل کيږي، خو هغه زيات شمیر نابالغ مهاجر ماشومان چې ايټاليا ته رسيږي، هغوی بيا په دغه رديف کې نه راځي».
واټونو په غاړه د بدن نمایش
د فرانسې خبري آژانس پر حواله، هغه مهاجرې ښځې چې په جنسي کاروبار کې داخليږي، د نارينو د جذبولو په موخه تر ډیره حده د واټونو پر غاړه دريږي، څرنګه چې په فرانسې، هسپانيې، اتریش او نورو اروپايي هيوادونو کې دغه کار ترسره کيږي.
د مهاجرت نړيوالې ادارې، اوس په ايټاليا کې د دوه نايجريایي ښځو په ګډون یوه ۱۳ کسيزه ډله تشکيل کړې ده، دغه د هغو ښځو د ژغورنۍ په برخه کې کار کوي کوم چې د قاچاقبرانو په ولکه کې وي اوپه جبري توګه جنسي کاروبار ته استخدام کیږي.
پر ورته موضوع یو انځوريز البوم زموږ له آرشيف څخه (22.03.2016):
انساني قاچاق وړونکي، افريقايي انجوني او بدلمني
د دویچه ویله دوو خبریالانو جان فلپ شولز او آدریان کریش، په نایجیریا کې د انساني قاچاقبرانو په هکله پلټنې کړي. د قاچاقبرانو د تعقیبولو ترڅ کې د دوی سر تر ایټالیا پورې ورسید، خو د خاموشۍ له یو دیوال سره مخامخ شول.
انځور: DW/A. Kriesch/J.-P. Scholzد دویچه ویله دوو تنو خبریالانو د انساني قاچابرانو پسې د لټون لړۍ له نایجیریا د ایدو ایالت څخه پیل کړ. دوی چې له هر چا سره لیدل د هغه یو نه یو خپلوان به ضرور په اروپا کې وو. په ایټالیا کې د بدلمنه ښځو دری پر څلورمه برخه د دغې سیمې نجوني دي. بې روزگارې له دغې سیمې څخه د مهاجرت اصلي لامل گڼل کیږي.
نن بیبینا ایمناها، د څو کلونو راهیسې په ځانگړي توگه ځوانو نجونو ته خبردارې ورکوي چې اروپا ته له سفر کولو څخه ډډه وکړي. ایمناها وایې: «ډیرې نجونې د درواغو ژمنو په جال کې بند پاتې کیږي. دوی ته ویل کیږي چې په کورونو کې به د خدمې یا ورته کارونه کوې، خو کله چې اروپا ته ورسیږي بیا نو دوی درواغ معلوم شي. له همدې امله ډیرې نجوني د مجرمو ډلو لاسو ته ولیږي.»
تر ډیرو هڅو وروسته یو قاچاقبر له دویچه ویله سره خبرو ته راضي شو. هغه وویل چې تر سلو ډیر خلک یې له نایجیریا څخه لیبیا ته رسولي دي. د هغه په خبره د «د ایدو خلک ډیر حریص دي او د ښې راتلونکي له پاره هر څه کولو ته تیار دي.»
دغه قاچاقبر چې ځان اسټیو معرفي کوي وایې چې له نایجیریا څخه تر لیبیا پورې له هر کس څخه ۶۰۰ ایرو اخلي. ډیرې پوهیږي چې له دښتې او صحرا له لارې لیبیا ته رسیدل څومره خطرناک دی. په دې ترڅ کې ډیر شمیر خلک خپل ژوند له لاسه ورکوي.
د «اگادیز» دښته د دویچه ویله د خبریالانو راتلونکې منزل وو. د دوی په خبره دا ډیره خطرناکه سیمه ده. په دې دښته کې دغه خبریالان یوازې د وسله والو محافظینو سره سفر وکولې شو.
هره دوشنبه تر لمر ولیدو وروسته د څو لاریو یوه قافله د اگادیز دښتې څخه د شمال پر لور روانیږي. په لیبیا کې د نا کراریو له امله انساني قاچاقبران بې له کوم ممانعت څخه دغه هیواد ته داخلیږي او د مدیترانې ساحل ته ځان رسوي.
د مهاجرو شمیر مخ پر ډیریدو دی او نجونې باید کم عمره وي
د نایجیریا ډیرې نجونې د فحشا بانډونو په لاسو کې ولیږي. مدني فعاله لیزا بیرتینې وایې: «د شمیرو له مخې په ۲۰۱۴ کال کې تر ۱۰۰۰ ډیرې نایجیریایې نجوني او میرمنې د مدیترانې له لارې ایټالیا ته رسیدلي دي. په ۲۰۱۵ کال کې دا شمیر ۴۰۰۰ ته لوړ شو.» نوموړۍ زیاتوي چې کوښښ کیږي د نجونو عمر کم تر کم وښودل شي.
د نایجیریا د یوه دوست په مرسته دغه دواړه ژورنالستان د ایټالیا په شمال کې یو «مادام» ته ورسیدل. نایجیریا کې دلالې ته مادام ویل کیږي. په ایتالیا کې یوې نایجیریایۍ نجلې وویل: «مادام پر موږ تشدد وکړ او بدلمنې ته یې مجبوره کړو.»
کله چې د دویچه ویله خبریالانو پر مادام د لگول شوو مختلفو تورونو په هکله پوښتنې وکړې، نو هغې ومنله چې په کور کې یې ۶ نجونې موجودې دي. خو دا رد کړه چې دغه نجونې یې بدلمنې ته اړ ایستلي دي.
د مونیکا اوشکوی په نوم یوې راحبې په دې برخه کې ایټالوي ادارې په نه پاملرنې تورنوي او انتقاد پرې کوي. نوموړۍ د تیرو ۸ کلونو راهیسې بدلمنۍ ته اړ ایستل شوو نجونو په برخه کې کار کوي. نوموړی زیاتوي چې سړي غواړي په ډیرو کمو پیسو خپل جنسي خواهش پوره کړي، چې دا کار په ایټالیا کې له نایجیریایې ښځو سره د ۱۰ ایرو په بدل کې کولې شي.
