د حماس مشر اسماعيل هنيه، چې په قطر کې ميشت دی چېرې چې د حماس سیاسي دفتر هم دی، د تليګرام شبکې له لارې یې د یوې اعلامیې په خپرولو سره ويلي دي چې «موږ د اوربند يوه تړون رامنځته کولو ته ډېر نېږدې يو.» خو نوموړي په دې اړه نور جزيات نه دي ورکړي.
مذاکره کوونکي چې قطري منځګري هم پکې شامل دي، د يوه داسې تړون د رامنځته کولو هڅه کوي چې له لارې یې د هغو تر ۲۰۰ ډېرو يرغمل شويو کسانو خلاصون هم تضمين شي چې د اکتوبر د ۷مې نیټې له بريدونو راهېسې په غزه کې ساتل کيږي.
د امريکا متحده ایالاتو حکومت هم ويلي دي چې يو بالقوه تړون نېږدې دی.
د امريکا د ملي امنيت شورا وياند جان کیربي، وويل: «موږ باور لرو چې [يوې هوکړې] ته نېږدې يو.» نوموړي زياته کړې چې په شدت سره په دې تړاو کار روان دی.
کيربي تر دې مخه وويل چې په خبرو اترو کې د ښځو، ماشومانو او امريکايي اتباعو آزادول لومړيتوب لري.
د متحده ایالاتو ولسمشر جو بايدن، هم ويلي دی چې يوه هوکړه نېږدې ده.
د اسرائيل حکومت تر اوسه د احتمالي اوربند په تړاو د حماس پر تازه اعلاميه تبصره نه ده کړې.
د حماس ډله د يو شمیر هېوادونو له خوا چې امريکا متحده ایالات، اسرائيل، آلمان او همدا راز اروپايي اتحاديه پکې شامله ده، د يوه ترهګریز سازمان په توګه درجه بندي شوې ده.
د حماس له مشر سره د «بشري مسایلو« په اړه خبرې اترې د سره صليب نړیوالې کميټې (ICRC) د دوشنبې په ورځ وويل چې د دغه کمېټې مشرې په قطر کې د حماس ترهګرې ډلې له مشر سره د بشري مسايلو په تړاو خبرې اترې کړي دي.
د سره صليب مشرې ميريانا سپولجاريک، لومړی د حماس له مشر اسماعيل هنيه، او بيا په جلا ډول له قطري چارواکو سره ليدلي چې په دې شخړه کې د منځګړي رول لوبوي.
دا ليده کاته په شخړه کې د ښکیلو ټولو اړخونو سره د هغو بحثونو يوه برخه ده د نړيوالو بشري قوانينو احترام ته د ودې ورکولو په موخه ترسره کیږي.
د دې کمیټې له خوا زياته شوې ده چې د یرغمل شويو د خلاصون په تړاو ترسره کیدونکو مذاکراتو کې شريکه نه ده.
رپوټ: په غزه کې تر لسو زرو ډېر اسرائيلي عسکر داسرائيل د «هاريڅ» ورځپاڼې د دغه هېواد د پوځ له قوله ويلي دي چې دمګړۍ په غزه تراړه کې د ځمکنيو تهاجمي عملياتو د برخې په توګه تر لسو زرو ډېر اسرائيلي عسکر مستقر دي.
د ورځپاڼې په حواله زياتره دا عسکر غزې ښار ته څېرمه په زيتون او جباليه سيمو کې مستقر دي.
ورځپاڼې زياته کړې ده چې د اکتوبر په وروستيو ورځو کې په پېل شويو دې عملیاتو کې تر اوسه يو شمیر اسرائيل عسکر د خپل پوځ په ډزو وژل شوي دي.
پوځ ويلي دي چې دا پېښې ارزول کیږي څو ترې د راتلونکي له پاره زده کړه وشي.
د اسرائيل رسنيو د دې عملياتو له پېل راهېسې تر اوسه د وژل شويو اسرائيلي عسکرو شمیر ۶۶ ښوولی دی.
زموږ له آرشيف څخه:
د مرګ او ژوند په منځ کي د غزې د فلسطینیانو انځوریز راپور
غزه د بشري ناورین په درشل کي ده. د اکتوبرمیاشتي پر اوومه نېټه د حماس د ترهګریزو بریدونو په ځواب کي د اسرائيل د ځوابي بریدونه دوام لري، په غزه کي د وژل سویو او ټپیانو شمېر مخ پر ډېرېدو دی. انځور: Fatima Shbair/AP/picture alliance د اسرائيل درانه ځوابي بریدونه پر اسرائيل د حماس د ناڅاپي تروریستي بریدونو په دوام، دغه هیواد هم پر غزه هوايي بریدونه وکړل چې د حماس ډلي په کنترول کي ده. اروپايي ټولنه، امریکا متحده ايالات او ځيني نور هیوادونه حماس تروريستي ډله ګڼي. د اکتوبر پر نهمه دوشنبه د اسرائيل لومړي وزیر بنیامین نتانیاهو وویل: «کوم څه، چي به موږ په راتلونکو ورځو کي له خپلو دوښمنانو سره کوو د دوی د راتلونکو نسلونو له پاره به لکه زنګ داسي وي.»
انځور: Belal Al SabbaghAFP/Getty Images د ملګرو ملتونو د بشري مرستو د همږغۍ دفتر(OCHA) په وینا نژدې ۸۰۰ تعمیرونه یومخ ویجاړي سوي دي او په سونو نور د اسرائيل په هوايي بریدونو کي تاواني سوي دي. راپورونه وايي، چي په سونو زره کسان اوبه نه لري.
انځور: Mohammed Talatene/dpa/picture alliance د پاته سویو کسانو په لټه کي د اسرائيل په هوايي بریدونو کي د غزې تراډي په شمال کي د جبالیه کډوالو پنډغالي له منځه تللي او ژغورونکي کوښښ کوي، چي پاته سوي ژوندي کسان وژغوري. هغه شمیرې چي د پنجشنبې په ورځ خپرې سوي دي، د دواړو لوریو قربانیان تر۲۵۰۰ زیات دي. لږ تر لږه ۱۲۰۰ اسرائيليان او ۱۳۰۰ فلسطینیان وژل سوي دي په زرهاوو کسان ټپیان دي.
انځور: Mahmud Hams/AFP/Getty Images مړي په یوه موټر کي وړل کیږي او یوه فلسطینۍ ښځه بوغاري وهي . په غزه کي د روغتیا مسؤلان وايي تر ۱۴۰ ډېر کوچنیان او ۱۰۰ ښځي وژل سوي دي.
انځور: Said Khatib/AFP/Getty Images فلسطینیان په یوه زاړه مني بس موټر کي د اسرائيل له انتقامي هوايي بریدونو څخه تښتي. د ملګرو ملتونو د یو راپور پربنسټ په غزه کي ۱۸۷ زره کسان بې ځایه سوي دي. ۱۳۷ زره کسانو د ملګرو ملتونو په ښوونځیو کي او ۴۰ زره په شخصي کورونو کي پنا اخیستې ده. امکان نه لري، چي د غزې تراډه دي یومخ پرېږدي. اسرائيل دغه سیمه محاصره کړې او د مصر لار يې هم تړلي دي.
انځور: Saleh Salem/REUTERS اسرایلي ځواکونه د غزي تراډي پوله خپله مهاروي د اسرائيل ځواکونه د غزې تراډي پر پوله ګزمه کوي. د حماس ډلي وسله والو د اکټوبر مياشتي پر اوومه پر پوله د اسرائيل درول سوی کټارې ماتي او دغه هیواد ته له ور اوښتلو سره یې عملیات شروع کړل، چي ډېری قربانیان يې ولسي وګړي ول. اسرائيل په ۱۹۹۴م کال کي د غزې پر پوله اغزن تار وغځاوه. په غزه کي د مصر سره پر پوله هم اغزن سیم درول سوی دی.
انځور: Oren Ziv/AP/picture alliance د غزې پر پوله اسرائيلي ځواکونه اسرائيل ۳۰۰ زره ریزرف ځواکونه چمتو کړي دي. د غزې اوسیدونکي ویره لري چي اسرائيل به مځکني عملیات شروع کړي. د غزې پولي ته د اسرائيل زغروال موټر او پوځي تجهیزات لېږل سوي او پولي ته څېرمه د اسرائيل ښارګوټي یومخ تش سوي دي.
انځور: Ilia Yefimovich/dpa/picture alliance په غزه کي انساني ناورین ته انتظار جان ایګلنډ د ناروې د کډوالو د شورا (NRC) عمومي منشي له CNN سره په مرکه کي خبرداری ورکړ، چي په غزه کي یو انساني ناورین سترګي په لار دی. «د بېلګي په ډول که چیري په روغتونونو کي د برېښنا د نشتوالي او لوږي له لاسه کوچنیان ومري، دا به جنګي جنایتونه وشمېرل سی.»
انځور: Mahmud Hams/AFP/Getty Images یحیی سنوار، په غزه کي د حماس د سیاسي دفتر مشر یحیی له ۲۰۱۷م کال راهیسي په غزه کي د حماس تروریستي ډلي مشر دی. هغه پر اسرائيل د برید له طراحانو څخه ګڼل کیږي. سنوار، چي د کډوالو په پنډغالي کي لوی سوی دی، ویلي دي: «موږ دا غوره ګڼو، چي شهیدان سوو، د دې پرځای، چي تر ظلم او سپکتیا لاندي ومروو.»
انځور: Mohammed Abed/AFP د حماس ویاند خبري اژانسونو ته ویلي دي چي هر واري چي اسرائيل بیله خبرتیا پر غزه بمبار وکړي یو نیول سوی اسرائيلی به وژل کیږي. په داسي حال کي چی د اسرائيل د باندنیو چارو وزیر الی کوهن ګواښ وکړ چي دا ډول کړنی به هیڅ ونه بخښل سي. حماس پر اسرائيل باندی د برید پرمهال په لسهاوو اسرائيليان له ځان سره ژوندي بیولي دي.
انځور: Mahmud Hams/AFP/Getty Images
