د افغانستان  له بېلابېلو ولایتونو څخه خبریالانو پر خپلو فیسبوک پاڼو او د خبریالانو په ګروپونو کې لیکلي، چې په سیمو کې یې د سلام او روشن مخابراتي شبکو او ورسره انټرنیټ بیا کار پیل کړی دی.

فرانس پریس خبري اژانس هم افغانستان کې د خپل خبریال له قوله لیکلي، چې د دغې هېواد په سویل کې دولتي ګرځنډه مخابراتي شبکې فعالیت پیل کړ.

اړوند: ملګري ملتونه: د انترنيت قطع کول بحرانونه لاپسې ډېروي

تر دې دمه له کابل، ننګرهار، کندهار، بلخ، غزني، هرات، کونړ او نورو سیمو د مخابراتي شبکو د بیا پیلېدو خبرونه ورکړل شوي دي.

ویل شوي، چې تر اوسه یوازې د سلام او روشن مخابراتي شبکې فعالې شوي دي.

دویچه ویله هڅه وکړه، چې په دې اړه د طالبانو ادارې نظر واخلي، خو له هغوی سره اړیکه نه ټینګېدله.

ځینو سرچینو لیکلي، چې په افغانستان کې د ځینو مخابراتي شبکو د فعالیت پیلولو اجازه له کابله د طالبانو ادارې رئیس الوزرا ورکړې، خو لا هم په دې اړه طالبانو کوم څه نه دي ویلي.