راپورونه وايي، چي د پاکستان حکومت د عمران خان د ډلي تحريک انصاف د مارش مخه بنده کړې ده. ويل کيږي چي د دې مارش د مخنيوي له پاره پر سړكونو باندي كانټينرونه اچولي دي او لاره ئې ورته بنده كړې ده.

دغه مارش چي اوږدوالی ئې نزدې اتو کيلومترو ته رسيږي، شاوخوا ۴۵۰۰ موټرو ته رسيږي.

د پاکستان حكومت وايي، چي ياده سيمه نا امنه ده او د امن په نامه دغه مارش دي په ټانک كي پاى ته ورسېږي او خپله جلسه دي هم دلته وكړي. خو دغه ډله بيا وايي، چي دوى به ځي او د وزيرستان په كوټكۍ سيمه كي به د سيمي له خلګو سره ويني او د بې پيلوټه الوتکو د بريدونو د بندولو غوښتنه به كوي.

د تحريک انصاف د ډلي مشر عمران خان په ډېره اسماعيل خان كي د لاريون تر پيلېدو د مخه له خبريالانو سره په خبرو کي وويل:

«د نړۍ يو قوت هم موږ وزيرستان ته له تلو څخه نه سي را ګرځولای. موږ به د امريكا د څارګرو الوتكو د بريدونو پر خلاف په ټوله نړۍ كي ږغ  پورته کړو.»

خو د سيمي خلګ او سياسي شنونكي باور لري چي د دې مارش هدف د بې پيلوټه الوتکو د بريدونو د بندولو غوښتنه نه، بلكي خپل سياسي كمپاين چلول دي.

كه څه هم د مذهبي ډلي مشر مولانا فضل الرحمن چي په وزيرستان كي زيات پلويان لري وزيرستان ته د عمران خان ورتګ خطرناک بولي، خو عمران خان ووايي:

«زه له وسله والو طالبانو څخه هيڅ وېره نه لرم، كه يې لرم نوهغه له فضل الرحمن څخه ده. هغه زما له محبوبيت څخه وېره لري.»

عمران خان وويل: «دولت د امن پر مارش باندي اعتراض کوي، زه په دعوه سره وايم چې دغه لاريون به يوه تاريخي بڼه ولري، ډېرى نړيوال هم د دغه لاريون له پاره راغلي او راسره ملګري دي.»

خو سيمه ييز خلک بيا دغه مارش ته د شک په سترگه گوري او وايي، چي دا مارش د سولي له پاره نه، بلکي خپلي سياسي موخي لري.

په دې دوه ورځني لاریون کې د جګړې ضد یوه دېرش كسيزه ډله هم ګډون لري، چي زياته برخه ئې ښځي دي.

د عمران خان تحريک انصاف ډله تر دې وړاندي هم د دغه بريدونو پر خلاف په پېښور او اسلام اباد كي د احتجاج په توګه راوتلې وه، خو چندان نتېجه ئې ورنه كړه.

حبيب تاثير/کوټه
کتونکی: نجيب الله زيارمل